د هرات د عامې روغتیا ریاست ویاند محمدرفیق شېرزی وايي، یوه ۶۵ کلنه ښځه چې پر کورونا ناروغي اخته وه درې ورځې وړاندې د دغه ولایت د کورونا د تشخیص په ځانګړي مرکز کې مړه شوه او د معاینې پایله یې پرون مثبته اعلان شوه.
د نوموړي په وینا، یو ۴۵ نارینه هم پرون مازدیګر په دغه مرکز کې ومړ.
دا په داسې حال کې ده چې د تېرو ترې ورځو پر مهال په هرات کې پر کورونا ۳ اخته کسان مړه شوي دي.
د هرات د عامې روغتیا ریاست د شمېرو له مخې، تر اوسه په دغه ولایت کې ۳۹۰ کسان پر کورونا اخته شوي چې ۱۲۹ یې ښځې دي. تر اوسه د درې ښځو په ګډون ۱۰ کسان د کورونا ویروس له کبله مړه شوي هم دي.
اوس په هېواد کې ۱۷۰۳ کسان پر کورونا اخته شوي، ۵۷ مړه او ۲۲۰ نور بېرته رغېدلي دي.
