سوو و برق وزیری علی‌احمد عثمانی‌نینگ ایتیشیچه، افغانستان-هند اورتاقلی توغانی (سلما) ایشی یکونله‌ماقده و کیله‌سی ییل بهاری‌گه قدر ایکی توربین برابریده کوتریلیشی بیلن 28 میگاوات برق تولید قیلیشی ممکن.
جناب عثمانی، سلما توغانی ایشی قنقه‌لیگی اوچون هرات بارگن ایدی. اونینگ ایتیشیچه، بو ایکی توربین قوریلگنی‌دن کیین کیله‌سی ییل جوزا آیده اوچینچی توربین هم قوریلیشی ممکن و اوندن کیین برق تولید قیلیش ظرفیتی 42 میگاوات‌گه کوتاریله‌دی.
اونگه کوره، بو ایکی توربین تولید قیله‌دیگن 28 میگاوات برق، هرات شهری‌نینگ بیر قسمی‌گه ترقه‌تیله‌دی. اما بو توغان ایشی توگه‌لیب اوچله توربین هم قوریلگنی‌دن کیین، جمهور رییس و سوو و برق وزیری بو باره ده تصمیم آله‌دیلرکه ولایت قیسی نقطه‌لریده برق بیرسه‌لر.
سوو و برق وزیری‌نینگ ایتیشیچه، حاضر افغانستان – هند اورتاقلیک توغانیده 68 میلیون متر مکعب سوو ییغیلگن و بو سان باید 120 میلیون متر مکعب‌گه یوقاری بارسه. جناب عثمانی‌گه کوره، هیچ بیر قیینچیلیک اینیقسه امنیتی مسئله چشت تومنی و سلما توغانی ساحه‌سینی تهدید قیله‌آلمیدی.
هندنینگ هراتده‌گی باش قونسولی حمید کمار مشرا هم بو توغان ایشی توگه‌لیشی‌دن خرسندلیک بیلدیریب، هند اولکه‌سی هردایم افغانستان بیلن یاردملشیب کیلگن و بوندن بویان هم بو یاردملری دوام ایتیشی ممکن دیگن.
ایتیلیشیچه، افغانستان – هند اورتاقلیک توغانی سوو و برق وزیرلیگی تامانیدن ترتیب بیریلیب پارلمانده یوباریلگن. سوو و برق وزیرلیگی تامانیدن 10 کیشیلیک متخصصلر بولایحه پارلماندن تأیید بولیشی بیلن عمل‌گه آشیریلیشی اوچون توظیف بولگن‌لر.
سلما توغانی توزه‌تیلیش لایحه‌سی محمدداوود خان دولتی‌نینگ ییریک لایحه‌لریدن بولیب، 1976- ییل هند اولکه‌سی یاردمی بیلن ایشی باشلنگن ایدی. بو توغان توزه‌لیش ایشی نیچه دهه اوروشلردن کیین، میلادی 2005- ییل قیته باشلندی.
سلما توغانی 20 کیلومتر اوزونلیگی و 3 کیلومتر اینی بیلن، 640 میلیون مترمکعب سوونی اوزیگه آلیب 42 میگاوات برق و 80 مینگ جریب ییرگه سوو بیریش ظرفیتی‌گه ایگه دیر.
