ناتینچ‌لیک‌لر کوپه‌ییشی، آیدین کیله‌جک بولمه‌گنی و مملکت یشاوچیلری‌نینگ قاچیشی باعث، هرات‌ده اوی و ییر ارزشی کوتیلمه‌گن حالده کمه‌یگن. هرات شهریده معاملاتی بانگاه ایگه‌لریدن بیرقطاری‌نینگ ایتیشیچه، اوی و ییر قیمتی کمه‌ییشی‌گه قوشیمچه، اوی کرا‌سی و گرو قیمتی اوتکن بیش آی‌گه قره‌گنده قویی کیلگن.
اولرگه کوره، بیش آی آلدین 200 مینگ دالر قیمتی بولگن اوینی، حاضر کیم‌سه 130 الی 150 مینگ دالر آلمه‌یدی. بانگاه دارلرنینگ ایتیشیچه، بوندن آلدین هرات شهری‌نینگ اینگ یخشی موقعیتی‌ده، بیر متر 600 الی 700 دالر ایدی؛ بیراق حاضر 300 الی 350 دالرگه کمه‌یگن.
سلام‌وطندار تامانیدن، هرات شهری‌نینگ نیچه مهم منطقه‌سیدن قولگه کیریتیلگن معلومات‌گه کوره، شهر ایچیده ییر قیمتی اوتکن ییل‌گه قره‌گنده 40 فایز کمه‌یگن. معاملاتی بانگاه ایگه‌لری‌نینگ ایشانچی‌گه کوره، افغانستان خلقی‌دن کوپینچه‌سی مملکت‌ده کیله‌جک‌لری خصوصیده، ایشانچی‌نی قولدن بیرگن. امنیتی وضعیت یمانلشگنی، اونگه قوشیمچه اقتصاد ثبات سیزلیگی مملکت‌ده سرمایه یاتقزیش اوچون خلق خواطری‌نی کوپه‌یتیریب و سرمایه‌لرینی چیقاریش‌گه باعث بولگن.
هرات یشاوچیلری‌نینگ بیرقطاری‌گه کوره، ناتینچ‌لیک‌لر کوپه‌ییشی، اقتصادی بنالر کینگه‌ییشی و رواجلنیشی خصوصیده بیللی لایحه بولمه‌گنی و خلق امیدسیزلیگی کونسایین آرتیشی باعث، کیم‌سه سرمایه‌سینی اوی و ییر آلیش‌گه صرفلمه‌یدی. هرات یشاوچیلری‌نینگ آگاه‌لنتیریشیچه، شونینگ‌دیک ملی بیرلیک حکومت باشلیغ‌لری تامانیدن، مملکت اقتصادی و امنیتی وضعیت‌گه دقت قیلینمه‌گن صورتده، خلق خواطرلیگی و قورقینچ‌لری باعث، کوپینچه مردم مملکت‌نی ترک ایته‌دی.
هرات ولایتی کینگشی عضوی حبیب‌الرحمان پدرام، مملکت حاضرگی وضعیتی‌نی ملی بیرلیک حکومتی‌نینگ بیر ییل‌لیک ایشینی نتیجه‌سی بیلیب ایتیشیچه، حکومت رهبرلری خلق ایسته‌گی‌گه دقت قیلمه‌گن و خلق برچه سرمایه‌سینی مملکت‌دن چیقاریش‌گه مجبور دیر.
شونینگ‌دیک مملکت امنیتی و سیاسی تقدیری چیگل بولیب قالگن، انه شونده‌ی بازارلرده سودا و ساتیق تیزیمی ثبات سیزلیک‌که روپه‌ره بولگن. خلق افغانستان کیله‌جکینی آیدین کورمه‌یدی. بو وضعیت قچان‌گچه دوام ایتیشی بیللی ایمس؛ بیراق هر بیر صورتده، مملکت اقتصادی‌نینگ قلبی هرات ولایتی ایش‌دن توشماقده.
