جمهورلیک ریاستینینگ مالی و بانکدارلیک ایشلری بوییچه مصلحتی دفترینی عامهوی علاقه بولیمینینگ مسؤولی، جاری هفته کابل-استانبول آرهسیده هوایی دهلیز آچیلیشیدن خبر بیردی.
جمهورلیک ریاستینینگ مالی و بانکدارلیک ایشلری بوییچه مصلحتی دفترینی عامهوی علاقه بولیمینینگ مسؤولی سمیر رسانینگ ایتیشیچه، کیلهجک ایکی کونده اوشبو هوایی دهلیزنینگ ایجاد ایتیلیش کیلیشووی نهایی بولیب و جمهور رئیسنینگ مالی و بانکدارلیک ایشلری بوییچه ییریک مصلحتچیسی، کامایر هوایی شرکتی و افغانستان صنعت و سوداگرلیک اتاقی آرهسیده امضاءلنهدی. جناب رساگه کوره، اوشبو کیلیشوو امضاءلنگنیدن سونگ، 15 تُنلیک قوریق میوه، قالین، دارو بولهدیگن اوت و قیمت بها تاشلر یوکلنهدیگن بیرینچی اوچاق کیلهجک هفته کابل دن استانبول گه اوچهدی.
افغانستان و ترکیه آرهسیده هوایی دهلیز آچیلیش موضوعی اوتگن آی کابل گه کیلگن ترکیهلیک هیأت بیلن حکومت رسمیلری آرهسیده بیان ایتیلگن.
بونگه قوشیمچه، جناب رسانینگ ایتیشیچه، شونینگدیک کیلهجک هفته جمهور رئیسنینگ مالی و بانکدارلیک ایشلری بوییچه ییریک مصلحتچیلیک دفتری باشلیغی، ترکش ایرلاین هوایی شرکتی و افغانستان صنعت و سوداگرلیک اتاقی آرهسیده افغانستاندن سوداگرلیک توارلرنی سعودی عربستان گه انتقال بیریش کیلیشوو امضاءلنیشی ممکن. جناب رساگه کوره، اوشبو کیلیشوو امضاءلنگن صورتده، سعودی عربستان گه 5 تُن زعفران و قوریق میوه صادر بولهدی.
جمهورلیک ریاستینینگ مالی و بانکدارلیک ایشلری بوییچه مصلحتی دفترینی عامهوی علاقه مسؤولینینگ کوپهیتیریشیچه، کابل-استانبول و کابل-جده آرهسیده هوایی دهلیزلر آچیلگنیدن سونگ، صادرات میزانی آشیشی اوچون افغانستان و عرب بیرلیگی اماراتی آرهسیده باشقه بیر هوایی دهلیز آچیلهدی.
ایتیلیشیچه، کابل-بمبئی، کابل-دهلی و کابل-آلماتا آرهسیده هوایی دهلیزلر آچیلگنیدن بویان 86 اوچیشده 2500 تُن تازه و قوریق میوه و دارولیک اوت ایسلنگن مملکتلرگه صارد بولگن.
