د ازادو رسنیو ملاتړ (نی) ادارې چارواکي وايي، چې سږ کال په هېواد کې معلوماتو ته د لاس رسي په برخه کې پر خبریالانو ډېر محدویتونه لګول شوي دي.
د نی مشر مجیب خلوتګر وايي، چې په روان زیږدیز کال کې د خبریالانو پر وړاندې د زور زیاتي ۵۸ پېښې ثبت شوي، چې زیاتې هغه یې په چارواکو او زورواکي پورې اړوندې دي.
د نی د موندنو له مخې په ۷۲ سلنه خبریالانو هغه مهال محدودیتونه وضعه شوي چې دوی د معلوماتوغوښتنه کړې.
خلوتګر زیاتوي، په تېرو ۷ کلونو کې د خبریالانو پر وړاندې د تاوتریخوالو ۵۷۵ قضیې ثبت کړي، چې ۱۹۰ پېښې معلوماتو ته د لاس رسي په برخه کې دي.
په همدې حال کې معلوماتو ته د لاس رسي کمېسیون رييس سید اکرام افضلي وايي، د حکومت په کارونو کې د شفافیت یوه برخه دا ده، چې خلکو ته د معلوماتو ورکولو حق ورکړي.
نوموړی وايي، معلوماتو ته لاس رسی رڼښت او حساب ورکونې ته زمینه برابروي او خلک د حکومت اصلي څښتنان دي؛ حق لري، چې د دوی ژوند پورې تړولو پرېکړو په اړه معلومات ولري.
افضلي زیاتوي، معلوماتو ته لاس سرسي له پاره دوی کړنلاره او مقرره چمتو کړې، چې ولسمشر محمد اشرف غني هم د دغو مقررو د پلي کولو له پاره ضرب العجل ټاکلی دی.
د سپټمبر ۲۸مه معلوماتو ته د لاس رسي نړیواله ورځ ده. دغه ورځ په افغانستان کې داسې مهال نماځل کېږي، چې زیاتره وخت خبریالان د معلوماتو تر لاسه کولو پر وخت وهل، ټکول او ګواښل کېږي.
