جمهور رییس غنی حاضرگچه کوپینچه اقتصادی، سیاسی و اجتماعی مسئلهلر خصوصیده بویروغ بیرگن. بیراق کورینیشیچه، اوشبو بویروغلردن بیرقطاریگه حقوقی منبع بولمهی، جمهور رییسگه بیریلگن صلاحیتلر و حتی مملکت اساسی قانونیگه قرشی دیر.
جناب غنی انچه پیت آلدین، سالیق و مخابرات وزیرلیکلریدن مملکت بویلب مخابراتی ترماغلر مشترلریدن سالیق آلیش سیستمی قوریشلرینی سورهدی. جمهور رییس بویروغی اساسیده، مخابراتی ترماغلرنی هر بیر مشتریسیدن یوزده اون فایز سالیق آلینهدی. بیراق پارلمان ایشی باشلنگنیدن نیچه کون اوتکنیدن کیین، پارلمان اعضالری جمهور رییسنینگ، اوشبو بویروغینی ناقانونی بیلیب و اونی کوپینچه آواز بیلن رد قیلدی.
شونینگدیک سونگی کونلرده، جمهور رییس بیر بویروغ اساسیده، کابل بانک دوسیهسیگه عیبلنگنلردن بیری خلیل الله فیروزینینگ تورمهدن چیقاردی. خلیلالله فیروزینینگ قوییب یوباریلیشی سیاسی ییغینلر و میدیالرده قرشیلیکلرگه روپهره بولدی؛ نتیجهده جمهور رییس اوتکن (شنبهکون) بویروغینی قیته آلیشگه مجبور بولدی.
حقوقدانلر و سیاسی ایش بیلرمانلر ایشانچیگه کوره، جمهور رییس تامانیدن صادر ایتیلگن بویروغلر کیین مه کیین لغو ایتیلیشی خلق روانیگه سلبی تأثیر تشلهیدی. اولرنینگ ایتیشیچه، اویلهمسدن صادر ایتیلگن بویروغلر حقوقی قضیهلر خصوصیده جمهور رییس، طرفدارلری و مصلحتچیلرینینگ خبرسیزلیگینی کورستهدی.
پارلمان اعضاسی حفیظالله منصورنینگ سلاموطندارگه ایتیشیچه، جمهور رییسنینگ اویلنمهگن بویروغلری، اونینگ سیاسی سوادسیزلیگی و مملکت اجتماعی وضعیتیدن خبر سیزلیگینی کورستهدی. جناب منصورگه کوره، جمهور رییسنینگ ایریم قضیهلر خصوصیدهگی تأثیر سیز دستورلری اونینگ حکومت ایشلریگه مغلوب بولگنینی معلوم قیلهدی. جناب منصورنینگ ایتیشیچه، جمهور رییس، مملکت کوپینچه اونملی قضیهلری توغریسیده ایریم باسقینلر باعث، آرگه چیکیلیب و نفوذلی کیشیلر اوچون امتیاز تولشگه مجبور بولگن.
شونینگدیک پارلمان اعضالریدن باشقه بیری احمد بهزاد سلاموطندار بیلن اوتکزگن صحبتیده، جمهور رییس تامانیدن صادر ایتیلگن فرمانلر کیین مه کیین لغو ایتیلیشینی، تیزیم مغلوبیتی و مملکتدهگی وضعیت اوستیگه سلبی تأثیر تشلهگن دییدی. جناب بهزاد، جمهور رییس تامانیدن، خلیلالله فیروزی قوییب یوباریلیشی خصوصیده صادر ایتیلگن فرمان توغریسیده سوزیوریتیب ایتیشیچه، اوشبو بویروغ مملکت محکمهلری ایشانچ سیزلیگیگه سبب بولیب و خلقنی قضایی ادارهلر ایشلری خصوصیده ایشانچسیز قیلگن.
شونینگدیک کابل بیلیم یورتی استادلریدن بیری طاهر هاشمی، جمهور رییسنینگ سونگی بویروغینی ناقانونی بیلیب سلاموطندارگه ایتیشیچه، اوشبو صادر ایتیلگن فرمانلر دولت رسمیلرینینگ حقوقی قضیهلردن خبر سیزلیگینی کورستهدی. جناب هاشمیگه کوره، جمهور رییس کوپینچه قضیهلر توغریسیده اویلهمسدن بویروغ بیرهدی؛ جمهور رییسنینگ بو حرکتی، مملکت یشاوچیلری حقی کوزگه توتمسلیگینی معلوم قیلهدی.
پارلمان نمایندهلریدن بیرقطاری، جمهور رییس تامانیدن، خلیل الله فیروزی خصوصیده صادر ایتیلگن فرمان و شونینگدیک «هوشلی» شهرچه قوریش کیلیشووی توغریسیده ایتیشیچه، جناب غنی بیرینچیدن یازیلگن بویروغلرگه قول قویهدی و کیین اولرنی اوقیدی.
دیمک افغانستان جمهور رییسینینگ، ایریم بولیملر توغریسیده اونلرچه مصلحتچیسی بار، بیراق جمهورلیک ریاستی بویروغلری عملگه آشیریلمسلیک دلیلی بیللی ایمس. پارلمان نمایندهلری هردایم جمهور رییسنینگ قانون سیندیریشگه عیبلب کیلگن، لیکن جمهورلیک سرایی، اوشبو بویروغلرنی افغانستان خلقی منفعتیگه دیب بیلهدی.
