سلام‌وطندار میدیا ترماغی آرقه‌لی مملکت نینگ 8 ولایتیدن قولگه کیریتیلگن معلومات اساسیده، جمهور رئیس غنی شامل جمهورلیک ریاست سیلاوی نینگ نامزدلریدن کوپینچه‌سی ولایت‌لرده دفتر آچیب و سیلاو کمپاین‌لرینی آلغه آلیب بارماقده‌لر.
جمهورلیک ریاست سیلاوی نینگ نامزدلری اوچون دولتی منبع‌لردن فایده‌لنیش و تعیین ایتیلگن زماندن آلدین سیلاو کمپاین‌لری باشله‌نیشی جمهورلیک ریاست سیلاوی نینگ نامزدلری آره‌سیده جنجل توغدیرگن.
جمهورلیک ریاست سیلاوی نامزدلریدن کوپینچه‌سی قوشمه شکلده مملکت جمهور رئیسی محمداشرف غنی ییتکچیلیگی ده بولگن دولت قورووچی سیلاو تیمی دن تنقید قیلیش گه باشله‌گن.
نیچه کوندن آلدین، جمهورلیک ریاست سیلاوی‌نینگ نامزدلریدن بیری رحمت‌الله نبیل نینگ ادعا قیلیشیچه، سیلاو کمپاینی اوچون قوریلگن کمیده 40 دفتر دولت پولی دن فایده‌لنیب محمداشرف غنی اوچون کمپاین قیلووگه باشله‌گن.
عین حالده، اجتماعی ترماقلرده دولت قورووچی سیلاو تیمی آدرسیدن نشر ایتیلگن صورتلر، مذکور تیم اعضالری کمپاین گه باشله‌گن‌لرینی کورسته‌دی.
سلام‌وطندار میدیا ترماغی آرقه‌لی هرات، سرپل، تخار، قندوز، بامیان، غزنی، ننگرهار و فاریاب ولایت‌لریدن قولگه کیریتیلگن معلومات گه کوره، جمهورلیک ریاست سیلاوی‌نینگ نامزدلریدن کوپینچه‌سی اینیقسه جمهور رئیس غنی نینگ ییتکچیلیگی ده بولگن دولت قورووچی سیلاو تیمی مذکور ولایت‌لرده تعیین ایتیلگن زماندن آلدین سیلاو کمپاین‌لرینی باشله‌گن‌لر.
یوقاریده ایسلنگن ولایت‌لرده‌گی منبع‌لردن نقل قیلینیشیچه، دولت قورووچی سیلاو تیمی نینگ فعالیتی باشقه تیم‌لردن کوره جدی راق بولگن.
سرپل ولایت کینگشی باشلیغی محمدنور رحمانی نینگ ایتیشیچه، اوچ-تورت آیدن بویان دولت قورووچی تیمی آرقه‌لی سیلاو کمپاینی باشلنگن و غیر رسمی شکلده نیچه دفتر آچگن و روزه آیی جریانیده مذکور تیم آرقه‌لی اهالی گه افطارلیک بیریلگن.
شونینگدیک، تخار مدنی جماعه‌چیلیک اعضاسی شعیب شوکت نینگ سلام‌وطندارگه ایتیشیچه، سیلاو کمپاین‌لری قیشلاقلرده دوام ایتماقده و کمپاین گه خصوصی و دولتی مکتب‌لرنی اوقووچی‌لری جذب قیلینگن و بیلیم یورت اوقیتووچی‌لریدن بیرقطاری هم کمپاین قیلووگه باشله‌گن.
سلام‌وطندارگه ییتیشگن معلومات اساسیده، سیلاو تیم‌لری تورلی شکلده جمله‌دن پول ترقه‌تیش، تیم گه وفادار کیشی‌لرنینگ آت‌لری رویخطگه بیریلیشی اوچون قولی‌لیک‌لر یره‌تیلیشی و مدنی دفترلر نامی‌ده سیلاو کمپاینی اوچون دفتر ایجاد قیلیب سیلاو کمپاین‌لرینی آلغه آلیب بارماقده‌لر.
افغانستان بوییچه ایرکین و عدالت‌لی سیلاولر اداره‌سی اجراییه باشلیغی یوسف رشیدنینگ سلام‌وطندارگه ایتیشیچه، اولرگه ییتیشگن گزارش‌لرده هم سیلاو تیم‌لری تعیین ایتیلگن زماندن آلدین سیلاو کمپاین‌لری بیلن مشغول بولگنی بیلدیریلگن.
جناب رشیدگه کوره، سیلاولر ایرکین کمیسیونلری هم تعیین ایتیلگن زماندن آلدین سیلاو کمپاین‌لریگه توسیق بولیش اوچون هیچ بیر ایش قیلمه‌گن‌لر.
عین حالده، سلام‌وطندارگه صحبت بیرگن دولت قورووچی سیلاو تیم اعضاسی خوشحال خلیل، اولر ولایت‌لرنی بیرقطاریده دفتر آچگن‌لرینی تَن آله‌دی، بیراق ایتیشیچه، بو دفترلرنی سیلاو کمپاین‌لری اوچون تیارگرلیک آلینیشی خصوصیده آچگن‌لر و اولر حاضرگچه قانون گه قرشی هیچ بیر ایش قیلمه‌گن‌لر.
جناب خلیل گه کوره، دولت قورووچی سیلاو تیمی گه قرشی، اولرگه رقیب سیلاو تیم‌لری کینگ شکلده سیلاو کمپاین‌لرینی آلغه آلیب بارماقده‌لر.
سیلاولر ایرکین کمیسیونی نینگ ایتیشیچه، تعیین ایتیلگن زماندن آلدین کمپاین‌لرگه تیگیشلی تخلف‌لر و شکایت‌لر سیلاولر شکایت‌لرینی تینگلش ایرکین کمیسیونی تامانیدن تیکشیریلیشی کیره‌ک. بیراق، سیلاولر شکایت‌لرینی تینگلش ایرکین کمیسیونی بو موضوع توغریسیده جواب بیریش اوچون سلام‌وطندارنینگ تکراری قونغیراقلریگه جواب بیرمه‌گن.
جمهورلیک ریاست سیلاوی نینگ تقویمی اساسیده، سیلاو کمپاین‌لری جاری ییل 6- اسد ده باشلنه‌دی و 60 کون دوام ایته‌دی.
