په هرات ولایت کې د نړېوالو جراحانو په ګډون د المان، انګلستان او هندوستان هېوادونو جراحانو په خپلو منځو کې د روغتیا په برخو کې د پرمختګ او د تجربو د شریکولو په موخه دغه ناسته کړې ده.
په لویدیځ زون کې د ډاکټرانو د اتحاديې مشر عزیز احمد علومي وايي، په تېرو کلونو کې به یواځې د لویدیځ زون ډاکټرانو په خپلو کې ناسته کول، خو سږ کال له نورو هېوادونو نه هم جراحي ډاکټران راغلي دي.
د دغې ناستې جوړېدا له بهرنیو ډاکټرانو نه د نوي طب په اړه د تجربو د یادولو په برخه کې ګټور ګڼل شوی دی.
د هرات ولایت جراحان وايي، چې له بهرنیو ډاکټرانو سره دغه ډول غونډې کولی شي، چې دوی د طب په برخه کې له نویو پرمختګونو او روشونو خبر کړي.
د مغز او عصابو جراح ډاکټر محمدناصر ادیب وايي، چې په دغه غونډه کې ګډونوال متخصص ډاکټران د طب په برخه کې نوې تجربې او طریقې له جراح ډاکټرانو سره شریکوي، چې په عملي برخه کې ترې کار واخلي.
د طب په برخه کې نوي پرمختګونه او د مډرنې جراجۍ نوې لارې چارې د دغې غونډې موخې وې.
د غونډې د ګډونوال له ډلې بل جراح ډاکټر احمد رشاد حفیف وايي، د دغه ډول غونډو او ناستو برابرول دا ګټې لري، چې د هېواد جراحان په ځانګړي ډول د هرات د جراحي ډاکټرانو په پوهه کې زیاتوالی راولي او هېوادوال دې ته اړ نه شي، چې د درملونو لپاره نورو هېوادونو ته لاړ شي.
د دغې غونډې بهرني جراحان د هرات ولایت د ډاکټرانو د اتحاديي له خوا وربلل شوي وو.
په ورته وخت کې یو شمېر ډاکټران د امکاناتو له نه موجودیت، طبي وسایلو له نه شتوالي او امنیتي ستونزو له ډېرښت نه شکایت کوي، دوی له حکومت نه د اسانتیاوو د برابرولو غوښتنه کوي.
د افغانستان په زرګونه ناروغان هر کال د لازمو تجهیزاتو او متخصصو ډاکټرانو د نشتوالي له امله د درملنې لپاره بهرنیو هېوادونو ته ځي او د روغتیا د حاصلولو لپاره زرګونه ډالر لګښت ورکوي.
