بلخ ولایت لوازمی‌نی وقتینچه‌لیک رهبرلیک قیله دیگن عطامحمد نور تینچلیک مذاکره لایحه‌سی‌نی تنقید قیلیب ایتیشیچه، تورت تامانلمه ییغین‌لر جنگری طالب‌لرگه کوپراق جهازله‌نیش‌لری اوچون شرایط یره‌تدی.
بوگون شمالی مزار شریف شهریده افغان ملی کوچلریدن آرقه‌داشلیک بیلدیریش مناسبتی بیلن اوتکزیلگن ییغین‌ده صحبت قیلگن ولایت رهبری، طالب‌لر بار- بار حکومت‌نی الده‌گن دیگن. اما، حکومت باشلیغ‌لری هر دایم طالب‌لرگه ایناغه‌لیک قولینی اوزاتگن.
جناب نور، قیش‌ده جنگری طالب‌لر اوروش قیلیش قابلیتی‌نی قولدن بیریب، تینچلیک لایحه‌سی‌گه یوز کیلتیره‌دی؛ لیکن، بهار کیلیشی بیلن قیته اوروش آلیب باریش‌گه جانله نیشی توغریسیده تاکیدله‌گن.
بلخ سرپرستی، تینچلیک مذاکره‌سی‌نی شکست‌گه روپه ره دیگن. اونگه کوره، بو آقیم نتیجه بیریش اوچون هیچ قنده‌ی صداقت و ایشانچ موجود ایمس.
عین حالده، جمهور رییس‌لیک سرایی سوزلاوچی‌سی‌نینگ اورین باسری شاه‌حسین مرتضوی‌نینگ سلام‌وطندارگه ایتیشیچه، حکومت‌گه قرشی تورگن برچه گروه‌لر نابود ایتلیشی اوچون بار امکانیت‌دن ایش آلینه‌دی. لیکن، تینچلیک مذاکره‌سی‌گه کیله‌دیگن‌لر اوچون حکومت‌نینگ قوچاغی یاپیق ایمس.
هنوزگچه افغانستان، پاکستان، چین و امریکه نمانیده‌لری اشتراکی‌ده افغانستانده تینچلیک اورنه‌تیش مذاکره‌سی‌گه عاید تورت مرته ییغین اسلام آباد و کابل‌ده اوتکزیلدی. لیکن، مذاکره‌نینگ خلاصه‌سی اعلان ایتلیشی بیلن، قورال‌لی طالب‌لر بهاری اوروش‌نی شددت لشتیریش بیلن حکومت‌گه سلبی جواب بیردی.
