نورستان ولایتی‌نینگ یشاووچی‌لری مذکور ولایت‌ده تازه ایچیم‌لیک سوو و زمانوی شفاخانه بولمه‌گن‌لیگی بارهسیده شکایت قیلگن‌لر. ولایت ولسوال‌لیک‌لری شفاخانه‌سی‌ده هیچ بیر متخصص عیال یوق‌لیگی ایتیله‌دی.
اساسی یول بولمه‌گن‌لیگی سبب، کسل‌لرنی بیر ییردن باشقه ییرگه ییتکزیش اهالی قیین‌چیلیگی‌نی ینه‌ده آشیرگن.
نورستان ولایتی مندول ولسوال‌لیگی نینگ یشاووچی‌لریدن بیری محسن نینگ سلام وطندارگه ایتیشیچه، منطقه لری‌ده فقط بیرته ساغلیق‌نی سقلش اداره‌سی بار؛ بو شفاخانه برچه کسل‌لرگه فقط آغیریق‌نی قالدیرووچی «بروفین» دارو بیره‌دی.
ولایت‌نینگ باشقه بیر یشاووچی‌سی عبدالرحیم، مینگ بیر قیین‌چیلیک بیلن باله‌سی‌نی باشقه بیر ولایت‌گه دوالش اوچون آلیب کیلگن‌لیگی‌نی حکایه قیله‌دی. اونگه کوره، منطقه‌ده‌گی شفاخانه‌نینگ بیرگن دارولری باله‌گه سیره هم فایده قیلمه‌گن.
بونگه قرهمسدن، نورستان ساغلیق‌نی سقلش اداره‌سی مسوول‌لری نینگ ایتیشلریچه، بو اداره هر آلتی آی‌ده ینگی و صفت‌لی دارولرنی ولایت‌نینگ ولسوال‌لیک‌لریگه یوباره دی‌لر. ولایت شفاخانه‌سی نینگ مسوولی اسماعیل استانکزی نینگ سوزلریگه کوره، اوشبو اداره هر ییلی قیش کیرمس‌دن آلدین اهالی قیین چیلیک‌که قالمس لیک‌لری اوچون آلتی آیلیک دارونی ولایت‌نینگ اوزاق حدولری‌ده‌گی شفاخانه‌لرگه یوباره‌دی.
ولسوال‌لیک‌لرده عیال متخصص‌لر بولمه گن‌لیگی‌نی تصدیقله‌گن استانکزی‌گه کوره، عیال داکترلر ولایت‌نینگ اوزاق منطقه‌لری‌گه باریب وظیفه بجریش‌گه حاضر ایمس‌لر.
شونینگ‌دیک استانکزی، ولسوال‌لیک‌لرده عیال متخصص‌لر بولمه‌گن‌لیگی ییریک قیین‌چیلیک‌لردن ایکن لیگی‌نی تیلگه آلگن.
افغانستان ساغلیق‌نی سقلش وزیرلیگی‌نینگ معلوماتی‌گه کوره، سابق ییل‌لرده مملکت‌ده کوز یاره دیگن یوزمینگ خاتین‌دن 1600 ته‌سی حیات‌دن کوز یومردی؛ اما بو رقم ایسه سابقه سیز شکل‌ده 327 واقعه‌گه کمیگن.
شونینگ‌دیک بیش یاش‌گه تولمس‌دن آلدین حیات‌دن کوز یومه دیگن 257 باله‌دن حاضر 99 ته‌سی عالمدن اوته‌دی. شونینگ‌دیک وزیرلیک‌نینگ رسمی‌لری اوتگن اون اوچ ییل دوامی‌ده باله‌لرنینگ 50 فایزی فلج‌گه قرشی کسل‌لیک‌که ایملنگن‌لیگی‌نی تیلگه آله دی.
عین حالده، مملکت خلقی نینگ 60 فایزی‌گه صحی خذمت‌لر مهیا ایتیلگن.
افغانستانده دولت‌گه قره‌شلی 2000 مینگ‌دن آرتیق همده یوزلب خصوصی شفاخانه‌لر موجودلیگی‌گه قرهمسدن، مملکت بویلب 12 میلیون اهالی هنوز هم اجتماعی خذمت‌لرگه ایگه ایمس‌لر.
