نورستان ولایتی کینگش نمایندهلرینینگ ایتیشیچه، «کامدیش» و «کشتونز» قوملری اورتهسیده یوز بیرگن توقنشوده هنوزگچه 300 کیشی هلاک بولگن، اونلب کیشی ناگران و اونلب یشش بنا ایسه اوتگه کویب کیتگن.
ولایت اهالیسی، نورستان ولایتیده قومی قرمه – قرشیلیکلر کون – ساین کوپهیب بارماقده دیگنلر. اما، افغانستان حکومتی بو مساله اوچون هیچ قندهی اعتبار قرتمهگن.
اولرنینگ سوزلریگه کوره، قومی توقنشو نتیجهسیده اونلب یشش بنا اوته یانیب یوزلب درخت ایسه اورتهدن کیتگن. بیراق قیینچیلیک حل ایتیلیشی اوچون اهالی مراجعه قیلمهگن سبب دولت هم بو توغریده تفاوتسیز قالماقده.
ایتیلیشیچه، افغانستان شرقی ولایتنینگ مذکور یشاوچیلری اوچ ییلدن بیری « تاغلر و اورمان و خاتین» اوستیگه بیر- بیراولری بیلن توقنهشیب کیلماقده. نورستان ولایتینینگ آقسقاللری ولایتنینگ اهالیسی بوندهی ضدیتلرنی مسلمان بولمسدن آلدین میراث آلیب کیلگنلر دیگنلر.
نورستان ولایتنینگ آقسقاللریدن منورخان همدردنینگ اظهاراتیگه کوره، منطقهلرده دولتنینگ کوچسیزلیگی حتی قومی قرمه- قرشیلیکلرنی آلدینی آلیشگه هم حل یول تاپه آلمهگن.
جناب همدردگه کوره، جمعیتنینگ کوپهیب باریشی سبب اهالی ییرلرنی تازتیب آلیشلری نتیجهسیده محلدهگی ایکی قوم اورتهسیده توقنشوو روی بیریشیگه باعث بولیب کیلماقده.
نورستان ولایتیده شکایتنامه یازدیرگن قاری شیرمحمد مقابل تامان حاضر بولیشینی کوتهدی. اونگهکوره، کوپینچه قومی منازعهلر تاغلر همده اورمانلر سبب اورتهگه کیلهدی.
عین حالده ولایت کینگشینینگ باشلیغی سعدالله پایندهوزینینگ معلوم قیلیشیچه، بوندهی معما حل قیلیش محلی حکومتنینگ کوچیدن ایمس دیر. او، اخیرگی وقتلرده دولت اسدالله وفایی ریاستی آستیده اوشبو قیینچیلیکلر برطرف ایتلیشی اوچون نورستان ولایتیده کامدیش همده کشتونز قومی قیین چیلیگی حل ایتلیشی اوچون ییغین اوتکزگن ایدی، لیکن، هنوزگچه ایجابی نتیجه بیرمهگن.
باشقه تاماندن نورستان پولیس قوماندانلیگینینگ خوفسیزلیک آمری فاروقخان نینگ سلاموندارگه ایتیشیچه، پولیس هیچ بیر زمان بیر قومنی باشقه بیر قومگه هجوم قیلیشی اوچون رخصت بیرمیدی. اونگه کوره، دستلب قومی منازعهلر حل ایتلیشی اوچون محل آقسقاللریدن ایش آلینهدی، اولرنینگ مصلحتی ایجابی نتیجه بیرمهگن حالده، پولیس ارهلهشیشگه مجبور بوله دی
کامدیش ولسواللیگینینگ مثمر، پرک، زیارت و شکوت و نورگرام ولسواللیگینینگ ژونیا و پیار منطقهلریده هنوزگچه کامدیش و کشتونز قومی اورتهسیده یوز بیرگن منازعهلر نتیجهسیده ییریک تلفات یوز بیرگن.
ایتیلیشیچه، کشتونز و کامدیش قوملری اورتهسیده قرمه قرشیلیکلر ولایتدهگی قوملر اورتهسیدهگی قدیمی قومی منازعهلردن سنهلهدی.
نورستان ولایتی کینگش اعضالری نینگ آگاهلنتیریب ایتیشیچه، قومی منازعهلر حل ایتیلیشی اوچون دولت جدی اعتبار بیرمهگن حالده، کیلهجک ده بو وضعیت یامان بولیشی ممکن.
