حکومتنینگ یوقاری مرتبهلی رسمیلری ننگرهار ولایتیده داعش حرکتینینگ اعضالری نابود ایتیلگنی بارهسیده خبر بیرگنلریگه قرهمی، ولایت اهالیسی هنوز هم تومنلرده جنگری طالبلر بارلیگیدن خواطر بیلدیرگنلر.
بوندن بیر آی اول ولایتنینگ محلی رسمیلری، ننگرهارده داعش گروهی شکست بیریلگن لیگینی ایتگن ایدیلر.
ننگرهار ولایتینینگ مرکزی جلال آبادشهرینینگ بیر قنچه یشاووچیلری سلاموطندار بیلن قیلگن صحبتده، داعش قوریشیدن حتی شهرده هم تینچ ایمس ایکنلیکلرینی ایتگنلر. اولرنینگ سوزلریگه کوره، داعش گروهی هنوزهم ولایتنینگ بیر قنچه حدودلری جملهدن شینواری تومنیده فعالیت قیلیب، اهالیدن باج آلهدی.
جلال آباد شهرینینگ اهالیسی، مردم ایچیده هر کون داعشدن قوریش کوپهیب بارماقده؛ اما، حکومت اهالیدن فاصله آلیب، خلق قیینچلیگیگه اعتبار بیرمی دیگنلر. اهالینینگ ایتیشیچه، خلق کیچه تاماندن تینچ اویقوده هم یاته آلمیدی.
ولایتنینگ اهالیسی حکومتدن بو گروه مقابلیده خلق نی حمایت قیلیشنی سورهگنل
اچین تومنیده هنوز هم داعش گروهینینگ جنگریلری حکومت کوچلری تامانیدن اولدیریلیشی خبر ایتیلهدی.
اچین تومنینینگ ولسوالی غالب مجاهد، داعش مذکور تومنده سازماندلیک نقطه نظردن ضربه کورگن؛ لیکن هنوزهم کیشی لیک صورتده فعالیت قیله دیلر دیگن.
اونینگ سوزلریگه قرهگنده، داعش اچین تومنینی اوزی اوچون اساسی مرکز تنلهگن لیگینینگ بیرینچی سببی هم بو تومن خیبر پشتوانخواد منطقهسی بیلن چیرگهداش بولگنلیک نقطه نظردن اهمیت گه ایگه بولگن.
ننگرهار ولایت والیسینینگ سوزلاوچیسی عطاالله خوگیانی، افغان ملی کوچلری داعشنینگ مالیوی تامین ایتیلیش و تعلیم مرکزلرینی نابود قیلگن لیگینی ایتگن. سوزچی داعش گروهی حاضرگی کونده جدی شکستگه روپه ره بولگن دیگن.
امنیتی ایش بیلرمان انور سلطانینینگ معلوم قیلیشیچه، حکومت داعشنی ننگرهار ولایتیده نابود قیلگنلیگی بارهسیده بیرگن گزارشی توغری ایمس. لیکن او، داعش منتظم بیر برنامه اساسیده اوزیگه مدافعهوی حالت آلگن لیگنی رد قیلمه گن.
سلطانی کوت، هسکهمینه و اچین تومنلرینینگ 30% هنوز هم جنگری داعش حرکتی اشغالیده بولگن لیگینی تیلگه آلیب، منطقهده اهالینینگ ایکین ییرلری هم جنگری لر آرقهلی تارتیب آلینگن دیگن.
داعش حرکتی سونگی 7 آی مابینیده اچین، نازیان، هسکهمینه، کوت، چپرهار، بتکی کوت، پچیراگام و باشقه بیر قنچه منطقهلرده دولت کوچلری بیلن اوروش قیلیب کیلگن لیگی ایتیلهدی. دولت منبعی گه کوره، توقنشولر آقیمیده یوزلب جنگری داعش نابود ایتیلگن.
افغانستان شرقیده جایلشگن ننگرهار ولایتی اخیرگه بیر ییل جریانیده افغان ملی کوچلری و داعش جنگریلری اورتهسیده یوز بیرگن اوروش گواهی بولیب کیلگن. شونینگدیک سونگی وقتلرده نشر بولگن گزارشلرده داعشنینگ ننگرهار ولایتیده قوماندانی 85 عایله بیلن کنر ولایتیگه قاچیب اوتگن.
