افغانستان نماینده‌لر کینگشی، اوتگن هفته «چهارشنبه» کونی‌ده باشقه بیر جنجل گه گواه بولدی؛ نماینده‌لر، کینگش باشلیغی تعیین ایتیلیشی خصوصیده اوتمیش‌ده‌گی جنجل‌لری دوامی اوستیگه تأکید قیلگن بیرچاغده، فزیکی تارتیشمه گه باشله‌گن‌لر؛ نماینده‌لردن بیری باشلیغ میزی‌نی آغدردی و باشقه بیری کفش و سوو بوتلی‌نی باشقه بیراوی گه تامان آتدی.
کینگش باشلیغی نینگ میزی‌نی آغدرگن کیشی نینگ آتی سیداحمد خادم و بو کیشی قندهار ولایتی نینگ نماینده‌سی دیر. اوشبو موضوع توغریسیده سلام‌وطندارگه صحبت بیرگن جناب خادم نینگ ایتیشیچه، کینگش باشلیغی نینگ میزی‌نی نماینده‌لرنینگ آیاق آستی بولیب سینمه‌سی اوچون آغدرگن.
اونینگ ایتیشیچه، نماینده‌لردن بیرقطاری، بیر-بیراوی گه قرشی زور کورستماقچی بولگنده، بو ایشنی قیلگن و کینگش باشلیغی نینگ میزی جاییده بولگنده کوپراق زیان کوریشیدن قورققن.
نماینده‌لر کینگشی جنجلی‌دن چیققن ویدیوده قندهار ولایتی نینگ نماینده‌لریدن باشقه بیری سیداحمد سیلاب، کینگش باشلیغی میزی بیلن اوره‌شیب تورگنی کورینه‌دی. او، بو قضیه‌ده اره‌لشگنینی رد قیله‌دی، بیراق کینگش باشلیغی نینگ میزی آغدریلگنیدن مدافعه قیله‌دی. اونگه کوره، کینگش باشلیغی نینگ میزی دربه آلدی آلینیشی اوچون قویی گه آتیلگن.
اونینگ ایتیشیچه، کینگش باشلیغی نینگ میزی گه هیچ بیر زیان ییتمه‌گن و یالغیز جایی‌دن کوتریلگن.
کینگش باشلیغی نینگ میزی آغدریلیشی اجتماع ترماق ایشلاوچی‌لری نینگ جدی عکس‌العمل‌لریگه روپه‌ره بولدی. شونینگدیک، قانوندانلردن بیرقطاری نینگ ایتیشیچه، عمومی ملک‌که زیان ییتکزیش جرم سنله‌دی و بو نماینده‌لر محکمه قیلینیشی کیره‌ک.
