د افغانستان د ملي امنیت د ادارې پخوانی رییس رحمت الله نبیل وايي، چې د پاکستان دولت په نړۍ کې د ترهګرو ستر ملاتړ کوونکی دی او زیاتوي، دغه هېواد په سیستماتیک، همغږي او په ستراتیژیک ډول له نړیوالو ترهګرو ملاتړ کوي.
نبیل د ځېنو خپرو شویو اسنادو له مخې ویلي، چې د ټولو ترهګرو او سخت دریځو افراطیانو جړې په پاکستان کې دي او په دې هېواد کې ۵۱ ترهګریزې ډلې فعالیت کوي کوم، چې له دیني مدرسو د ویجاړیو له پاره خلک ګوماري.
رحمت الله نبیل د وړاندې شویو اسنادو پر بنسټ ویلي، چې د پاکستان څارګره اداره د طالبانو او القاعدې سره تړلې حقاني شبکې له غړو سره د وسلو، پیسو او پټن ځایونو په برابرولو کې نیغ په نیغه مرسته کوي.
دی وايي، خپاره شوي اسناد د پاکستان استخباراتو رسمي مکتوبونه دي، چې په دې اسنادو کې له طالبانو او حقاني شبکې سره د پاکستان د استخباراتو مرسته او د دوی د بریدونو په اړه معلومات ښکاره کوي.
د افغانستان د استخباراتو پخوانی رییس وايي، چې د ملي یووالي حکومت مشرانو د کار له لومړۍ ورځې، په پاکستان باور وکړ او دوی هیله لرله، چې له پاکستان سره به د اړیکو نوی څپرکی پرانیزي؛ په دې موخه یې له دې هېواد سره خبرې پیل کړې.
نوموړی زیاتوي، چې ولسمشر د ۲۰۱۴ کال د نومبر په میاشت کې په خپله لومړني بهرني سفر پاکستان ته ولاړ او هلته یې له پاکستانيو چارواکو په ځانګړي ډول د پوځ له لوی درستیز سره خبرې وکړې.
نبیل وايي، د ملي یووالي حکومت مشرانو او سلاکارانو د پاکستان حکومت له مشرانو، نظامي جنرالانو او د څارګرې ادارې له مشرانو سره یې د پردې ترشا خبرې وکړې.
جنرال نبیل زیاتوي، د افغان حکومت مشرانو د افغانستان د استخباراتي ادارو د اسنادو پر ځای د پاکستان مکر جنو نظامیانو ته ارزښت ورکړ او د "ملي یووالي حکومت په څو برخو کې په یو اړخیزه ډول د ملي ګټو خلاف د دغو غیرو رڼو مجلسونو په نتیجه کې پاکستان ته امتیازات ورکړل، بې له دې چې له دې هېواده د افغانستان له پاره امتیاز واخلي."
د ملي امنیت پخواني رییس لیکلي، چې د پاکستان د پوځ لوی درستیز راحیل شریف د یوې اونۍ د سفر په موده کې د امریکا باور ترلاسه کړ، چې دوی د ترهګرۍ د نابودلو په برخه کې ژمن دي.
دی زیاتوي، دغه سفر د دې لامل شو، چې امریکا اعلان وکړ، طالبان د دوی له پاره جدي ګواښ نه ګڼل کېږي او په سرحدي سیمو کې به په طالبانو د بې پېلوټه الوتکې بریدونه را کم کړي.
نبیل وايي، د ملاعمر د مړینې له تایید سره سم امریکا د لومړي ځل له پاره وویل، چې طالبان د پاکستان له خاورې اداره کېږي، خو بیا هم پاکستان خپل دوه ګوني سیاست ته دوام ورکړ.
نبیل په پاکستان کې د ترهګرو د ځپلو په اړه لیکلي، امریکا په دې باور وه، چې د پاکستان به د ضرب عضب په عملیاتو کې د حقاني شبکه او بهرني ترهګر په شمالي وزیرستان کې وځپي، خو پاکستان په ۲۰۱۴ میلادي کال کې د افغانستان د ولسمشرۍ تر ټاکنو شپږ ورځې مخکې پرته له هېڅ ډول مخکینۍ خبرتیا په یو اړخېز ډول په شمالي وزیرستان کې د ضرب عضب په نوم عملیات پیل کړل چې هدف یې په افغانستان کې د وضعیت خرابول وو او زیات شمېر ترهګر یې په همدې موکه افغانستان ته را دننه کړل.
دی زیاتوي، سره له دې چې پاکستان امریکایانو ته ژمنه ورکړې وه، چې د ضرب عضب په عملیاتو کې به د حقاني شبکه وځپي، خو دوی یوازې د پاکستان حکومت خلاف ډلې وځپلې.
رحمت الله نبیل سپارښتنه کړې، چې حکومت او افغان سیاسیون له رامنځته شوي وضعیت او پر پاکستان د سیاسي فشارونو له دې موقعې ګټه پورته کړي.
