تېره شپه د (جنورۍ پر ۲۹مه) ناپېژندو وسلهوالو د لوګر د مرکز پلعلم له پتخابشانې کلي نه د جانمحمد په نوم یو سلمان تښتولی او بیا يې ترې سر او چپ لاس پرې کړي دي.
۲۳ کلن جانمحمد د تاجمحمد زوی او تازه کوژدن شوی و، چې له کوره د کار پر لوري له لارې تښتول شوی.
د پتخابيشانې کلي یو اوسېدونکي جاوید سلاموطندار ته وویل، چې وژل شوی جانمحمد په پلعلم کې سلمان و او له چا سره شخصي دوښمنې نلرله.
هغه زیاتوي، د وژل شوي شخص جسد د کور مخې ته په داسې حال کې موندل شوی دی، چې سر او چپ لاس یې غوڅ شوی و.
د لوګر د والي ویاند سلیم صالح سلاموطندار ته د دغه خبر د پخلي تر څنګ وویل، چې وژل شوی شخص ملکي سلمان و او دولتي دنده یې نه لرله.
صالح زیاتوي، چې په دې اړه د لوګر ولایت امنیتي او کشفي ارګانونو خپلې پلټنې پیل کړي دي، چې د جانمحمد قاتلان ونیسي او د قانون منګولو ته یې وسپاري.
که څه هم تر اوسه د سلمان جان محمد د وژنې پړه چا په غاړه نهده اخستې؛ خو د مرکز پلعلم سلمانیان ګواښ کوي، که دولت چېرې د داسې وژنو مخنیوی ونهکړي؛ نو دوی به په لویو لاریونونو لاس پورې کړي.
