د ناټو سرمنشي ینس سټولټنبرګ وايي، په افغانستان کې د خپل حضور په اړه به د دغه سازمان د غړیو هېوادونو له دفاع وزیرانو سره خبرې وکړي.
د نوموړي په وینا، ناټو په افغانستان کې خپل حضور ته ژمنه ده؛ ځکه په وینا یې، دا د سولې هڅو د ملاتړ لپاره تر ټولو غوره لاره ده.
د ناټو په خبرپاڼه کې لیکل شوي: «موږ د پام وړ پرمختګونه کړي. کله چې پر بینالافغاني خبرواترو بحث کېږي، په دې مانا چې په دغه هېواد کې تلپاتې سوله راشي او د افغانستان د کړکېچ پای ته رسېدو لپاره یوه سولهييزه لاره پیدا شي.»
سټولټنبرګ د عراق د امنیتي او محلي ځواکونو روزنه او د هغوی ظرفیت لوړونه، دغه هېواد ته د داعش ډلې د بیا راتګ د مخنیوي لپاره تر ټولو غوره لاره ده او په وینا یې، په تړاو به یې د ناټو د غړیو هېوادونو له دفاع وزیرانو سره خبرې وکړي.
هغه زیاته کړې، اروپايي اتحادیه او ناټو په افغانستان او عراق کې نږدې همکاري لري او په عراق کې یې د هڅو پر ډېرېدو هم کار روان دی.
نوموړي د بلاروس کړکېچ ته په اشارې ویلي، یاد کړکېچ چې زموږ له پولو سره په ډېرېدو دی، له نږدې یې څاري او د بلاروس خلک حق لري چې خپل راتلونکی برخلیک خپله وټاکي.
د بلاروس د جمهوري رياست له ټاکنو وروسته چې الکساندر لوکاشنکوف يې کټونکی اعلان شو، په دې هېواد کې اګسټ مياشت کې لاريونونه وشول. لاريونوال وايي، ټاکنو کې درغلۍ شوي او د ټاکنو اصلي ګټونکی خانو تیخانو فسکایا دی.
د ناټو سرمنشي د ختیځې مدیترانې د وضعیت په اړه هم اندېښنه ښودلې او ویلي یې دي چې ترکیه او یونان دواړه د ناټو متحدان دي او اړتیا ده چې د مدیترانې په ختیځه برخه کې د وضعیت د کنټرول لپاره د نړیوالو متحدانو له روحیې او قوانینو سره سم یوه لاره وموندل شي.
هغه ټینګار کړی چې ناټو له انقرې او اتن سره په اړیکه کې ده او دغه سازمان یې د خبرواترو له لارې د مدیترانې په ختیځه برخه کې د رامنځته شوي وضعیت د کنټرول لپاره په یوه ښه بستر بدل کړی دی.
نوموړی وايي، شاوخوا دوه اوونۍ وړاندېیې له ولسمشر غني او عبدالله عبدالله سره په ټیلیفوني خبرو کې یې په افغانستان کې د ترهګرۍ پر وړاندې د ناټو د مبارزې د دوام ډاډ ورکړی او ویلي یې دي چې د سولې پروسې د ملاتړ لپاره به خپل حضور هم تنظیم کړي.
