د ولسي جرګې راتلونکې ټاکنې به په ټاکنیزو کمیسیونونو کې د نویو کمشنرانو له خوا ترسره کېږي.
د حکومت اجراییه رییس عبدالله تېره ورځ (پنج شنبه) ماښام په یوې خبري غونډه کې وویل، چې ټاکنیز سمون یوه جدي اړتیا ده او د اصلاحاتو پرته بله لار نشته.
عبدالله زیاته کړه، چې د راتلونکو ټاکنو چارې به په ټاکنیزو کمېسیونونو کې د نویو کمشنرانو له خوا پر مخ یوړل شي.
ده وویل، چې نور د افغانستان خلک د تېرو ترخو تجربو د بیا تکرار زغم نه لري او د رڼو ټاکنو له بنسټه پرته بله لار نه لرو.
دا په داسې حال کې ده، چې تېره ورځ د ټاکنو خپلواک کمېسیون مشر یوسف نورستاني اعلان وکړ، چې ملي شورا د دواړو جرګو له خوا د ټاکنیزو اصلاحاتو په اړه د ولسمشر تقنیني فرمان رد شوی او نور د ټاکنیز نظام د سمون کمېسیون او د غوراوي کمېټه مشروعیت نه لري.
افغانستان په ۱۳۹۳ زېږدیز کال کې تر ټولو لانجمنې ټاکنې درلودې.
سره له دې چې د ټاکنو په برخه کې د سمون راوستل د ملي یوالي حکومت د جوړېدو اصلي او بنسټیزه ماده یادېږي؛ چې د ولسمشر محمداشرف غني او عبدالله عبدالله تر منځ په سیاسي هوکړه لیک کې راغلې ده.
خو ملي شورا په تېره اونۍ د دواړو ټاکنیزو کمېسیونونو د دندو او واکونو په اړه د ولسمشر تقنیني فرمان رد کړ.
د ولسي جرګې غړو وویل، چې په هېواد کې د ټاکنو قانون شته او بل قانون ته اړتیا نشته.
دغه راز عبدالله وویل، چې ایران ته یې سفر له لاس ته راوړنو ډک و او زیاته یې کړه، چې په دغه سفر کې له ایراني چارواکو سره د ګډو امنیتي ستونزو، د کډوالو د ستونزو د حل او د سوداګری په برخو کې خبرې کړي دي او ایراني لورې هم د همکاریو ژمنه وکړه.
دی وايي، چې د افغانستان او ایران د همکاریو له پاره ایراني چاراواکو هوکړه وکړه، چې د دواړو هېوادونو له لورې یو ګډ کمېسیون جوړ شي او په سیاسي، اقتصادي، له ترهګرۍ سره د مبارزې او نشه یي توکو پر ضد پر ګډې همکارۍ کار وکړي.
