د کابل او اسلاماباد ترمنځ د اړیکو د ښه کولو په موخه د بهرنیو چارو وزارتونو په کچه درې واړو هېوادونو( افغانستان، پاکستان او چین) پر ډیالوګ هوکړه وشوه.
تمه ده، چې د دغو خبرو اترو د بهیر پېلولو سره به دواړو هېوادونو ترمنځ له پخوا پېدا شوي ترینګلي اړیکې بيرته ورغول شي او زیاته برخه به يې پر اقتصادي همکاریو ولاړه وي.
دغه راپور د پاکستان د دولتي راډيو لهخوا تایید شوی او ویلي يي دي، چې دغه هوکړه د پاکستان د بهرنیو اړیکو د سلاکار سرتاج عزیز او د چین د بهرنیو چارو وزیر "وانګ يي" ترمنځ په اسلاماباد کې وشوه او له افغان چارواکو سره هم خبرې شوي دي.
د دغه دوه اړخیز کړکیچ د لرې کولو په موخه به لومړی د کنټرول میکانیزم جوړېږي، چې له مخې به يې دواړه هېوادونه په ځينو مواردو بیړني تفاهمونه کوي.
سرتاج عزیز د چین د بهرنیو چارو له وزیر وانګ يي سره په اسلام اباد کې د یوې خبري غونډې په ترڅ کې وویل، چې افغانستان، پاکستان او چین همدا راز د افغان حکومت او وسلهوالو طالبانو ترمنځ د شرایطو د برابرولو لپاره د څلور اړخیزې ډلو پر بیا جوړولو سلا وکړه.
د دغو درېیو هېوادونو ترمنځ د څلور اړخیزې ډلې خبرې تېر کال وروسته له دې په ټپه ودرېدې چې اسلاماباد د طالبانو په باب له خپلو همکاریو لاس واخیست.
