په افغانستان کې د ناټو ځواکونو عمومي قوماندان د پروان ولایت له سېلاب ځپلیو سره د همدردۍ ښودلو ترڅنګ وايي، ناټو او افغان ځواکونه له هغو کورنیو سره مرستې کوي چې د سېلاب له کبله یې خپل ځان او مال له لاسه ورکړي دي.
په افغانستان کې د ناټو ځواکونو عمومي قوماندان سکاټ مېلر وايي، د افغانستان امنیتي او دفاعي ځواکونه او ناټو عادي ژوند ته د راګرځېدو لپاره له سېلاب ځپلیو سره مرستې کوي.
د نوموړي په وینا، افغان ځواکونه د ژغورنې او پاکولو د عملیاتو مشري او ناټو هم له بېځایه شویو کورنیو سره د اوبو، ډوډۍ او روغتیايي کڅوړو مرسته کوي.
ناټو تر اوسه په دغه ولایت کې پر سلګونو کورنیو لومړنۍ مرستې وېشلې دي.
مېلر پروان ته د خپل سفر پر مهال د سېلاب ځپلیو د ژغورنې په برخه کې د دغه ولایت له خلکو مننه کړې او ویلي یې دي چې سېلاب ځپلي ستاسو خویندې او ورونه دي.
هغه د سولې راتلو لپاره د امنیتي او دفاعي ځواکونو هڅې ستایلي او په وینا یې، طالبانو او نړۍ ته تل وايي چې تاوتریخوالی باید کم شي.
د پروان ولایت مرکز چاریکار د چهارشنبې په ورځ سهار دوه بجې سخت سېلاب لاندې کړ چې له کبله یې نږدې ۱۰۰ کسان مړه شوي او نږدې ۲۵۰ نور ټپیان دي.
د پېښو پر وړاندې د مبارزې په چارو کې د دولت وزارت په وینا، په یاده پېښه کې لږترلږه ۱۵۰۰ کورونه په بشپړ ډول ویجاړ شوي دي.
