د بدخشان د کډوالو چارو ریاست مسوولان په دغه ولایت کې د جګړې له کبله د بېځایه شویو کورنیو د ډېرېدو په اړه اندېښنه ښيي او وايي، ستونزې یې حلولی نهشي.
د بدخشان د کډوالو ادارې رییس عبدالواحد طیبي وايي، اوس شاوخوا ۵ زره بېځایه شوي په بد وضعیت کې ژوند کوي او له حکومت نه د مرستې غوښتنه کوي.
د نوموړي په وینا، بېځایه شوي خلک خوراکي او سوند توکیو، پاکو اوبو، ښوونځي او روغتیايي خدمتونو ته اړتیا لري، خو په وینا یې یاده اداره د امکاناتو نه موجودیت له کبله ورسره لازمه همکاري کولی نهشي.
په همدې حال کې د بدخشان د جرم ولسوالي یو بېځایه شوی سیفالدین وايي، په یاده ولسوالي کې یې د طالبانو له لاسه هر څه پرې ايښي او د فیضاباد ښار په یوه څنډه کې د ژوند له لوړنیو اړتیاوو او امکاناتو پرته ژوند کوي.
د نوموړي په وینا، ځینې کورنۍ په کرايي کورونو او ځینې هم په خیمو کې ژوند کوي او تمه لري چې د کډوالو چارو اداره به ورسره لازمې مرستې وکړي.
بلهخوا د بدخشان د ولایتي شورا مرستیال احمدجاوید مجددي هم په دغه ولایت کې د بېځایه شویو له ناوړه وضعیته اندېښنه څرګندوي او وايي، که په ژمي کې ورسره لازمې مرستې و نهشي، له جدي ستونزو سره به مخ شي.
نوموړی زیاتوي، حکومت تر اوسه د کډوالو ستونزې حل کړي نهدي.
په بدخشان کې د ناامنیو له ډېرېدو او د طالبانو د جګړهییزو سیمو له پراخېدو وروسته، له تېرو څو کلونو راهیسې شاوخوا ۵ زره کورنۍ له خپلو اصلي مېنو کډه کولو ته اړ شوي چې اوس له سختو ستونزو سره لاس او ګرېوان دي.
