د غزني د اصلاحاتو او ملکي خدماتو اداره او د دغه ولایت یو شمېر اوسېدونکي وایي، په داسې حال کې چې له ډېرو د زدکړو وروسته هم بې کاره دي، خو زورواکان د بېلابېلو پلمو له امله د غزني دولتي بستونه نیسي او یا هم دغه بنستونه د ادارو مسوولاو له خوا اخیستل او پلورل کېږي.
د غزني د ملکي خدماتو او اداري اصلاحاتو ریاست سرپرست مسعود معصومي هم په دغه ولایت کې د دولتي کارکوونکیو د ګومارني بهیر کې د زورواکیو د لاسوهنې خبره مني، وایي، چې د دغه کار دوام د دولت او خلکو ترمنځ واټن پيدا کړی دی.
د معصومي پر وینا، دوی د یو شمېر ولایتي شورا وکیلانو، د ملي شورا د غړیو او د ځېنو وزارتونو د چارواکیو د لاسوهنو له امله په دولتي ادارو کې د سیالۍ ازموینې تحریمې کړې دي.
نوموړی وایي، چې سږ کال ۱۵۰ تنه له ازموینې وروسته په دولتي پوستونو کې ګومارل شوي دي، خو د دغه ولایت د اطلاعاتو او فرهنګ ریاست ۱۲ بستونه د ځېنو ستونزو له امله ځنډول شوي دي.
د غزني اوسېدونکي وایي، چې د دولتي بستونو د ازموینې ګومارنې بهیر تر ټولو سیاسي، ستونزمن او پر فساد ککړ بولي او وایي، چې اکثره وخت د زورواکیو د لاسوهنې له مله ازموینه ځنډول شوې وي.
د غزني یو اوسېدونکی موسی خان د خپلو سترګو لیدلي حالت په اړه وايي، چې پر یو بست د مقررۍ پر سر د ولایت د چارواکیو تر څنګ اړوند ماموران له ۵۰۰ ډالرو نه نیولې تر ۱۰۰۰ ډالرو پورې رشوت غواړي.
د غزني ولایتي شورا رییس حمید الله نوروز هم دغه ستونزه جدي ګڼي او مني، چې په دې ولایت کې دولتي بستونه پلورل کېږي.
نوروز زیاته کړه، چې حکومتي مسوولان د کارکوونکیو په ګومارنه کې د فساد مخنیوی نه شي کولی او د سیاسي اړیکو د ټینګولو له پاره دغه بهیر کې ستونزې جوړوي.
خو د غزني والي ویاند جاوید سالنګي د ولایتي شورا د رییس او د خلکو د ادعا په ردولو سره وایي، چې د ولایت مقام هڅه کوي او کړې یې ده، چې د دولتي مامورانو په ګومارنه کې روڼوالی رامنځته شي او دغه بهیر کې د زورواکیو د لاسوهنې مخه ونیول شي.
د سالنګي په خبره، که چېرې د ګومارنې په بهیر کې د غزني اوسېدونکي له فساد سره مخېږي؛ باید په مستقیم ډول د ولایت مقام سره اړیکه ونیسي.
په ورته وخت کې د غزني د پوهنې رییس محمد عابد عابد وايي، چې په ټولو ازموینو کې د ادراي اصلاحاتو استازي موجود وي، خو زورواکي او سیاسي ډلې په دغه بهیر کې د لاسوهنو هڅې کوي.
