غور یشاوچیلریدن بیری وکیل احمد ناقانونی مهاجرلیک آرقهلی ایرانگه بارگن و اوشبو مملکت حربیلری تامانیدن ایکی کیچه و کندوز ایاق دن آسیلگن.
وکیل احمد 6 آی آلدین نیمروز چیگرهسی آرقهلی ایرانگه بارگن، بیراق اوشبو مملکت نینگ کاشان منطقهسیده ایران حربیلری تامانیدن قولگه آلینگن.
اوشبو افغانستانلیک یاش نینگ ایتیشیچه، 10 کیچه و کندوز آچلیک، سووسیزلیک و قاچاقچیلرنینگ تحقیرلرینی تحمل قیلیش بیلن اصفهان شهریگه ییتیشگن.
وکیل احمد 6 آی اصفهان ده بیر بنا ده شغللنگنیدن سونگ، اوتاقی تامان بارهدیگن بیر چاغده، ایران حربیلری تامانیدن قولگه آلینگن.
اوشبو یاش نینگ سلاموطندارگه ایتیشیچه، ایران حربیلری تامانیدن ایکی کیچه و کندوز ایاغیدن آسیلگن و اذیت قیلینگن.
وکیل احمد نینگ کوپهیتیریشیچه، اونینگ عیبی عایلهسینی اقتصادی قیینچیلیگینی حل قیلش اوچون ناقانونی مهاجرلیک آرقهلی ایرانگه باریش ایدی.
«مینی ایاغیم دن آسدیلر و کوزلریمگه یاش کیلتیرهدیگن گاز اوردیلر. ایکی کیچه و کندوز کلتکلهدیلر؛ افغانستانگه بارگن گهقدر کوزلریم آچیلمس ایدی. ایکی کیچه و کندوز کیم ایران حربیلرینی نظارتیگه ایدیم سوو و آذیق-آوقات بیرمس ایدیلر.»
شونینگدیک، سرپل یشاوچیلریدن بولمیش 25 یاشر نقیبالله هم و کیل احمد کبی ناقانونی مهاجرلیکنی تجربه قیلگن.
نقیبالله نینگ ایتیشیچه، اوچ آی آلدین ناقانونی مهاجرلیک آرقهلی ایرانگه بارگن ایدی، بیراق اوشبو مملکتده بیر هفته قالگنیدن سونگ، ایران حربیلری تامانیدن قولگه آلینیب و قیتهدن سورگون ایتیلگن.
اونینگ ایتیشیچه: «قاچاقچیلر مینی موتردن تشلهدی، ییرگه توشدم. موتر ایاغیمنی اوستیدن اوتی و ایاغیم موترنی آستیگه قالدی.»
افغانستانده اوروش و ایشسیزلیکلر سبب، کوپ قطار یاشلر عایلهلری نینگ اقتصادی قیینچیلیکلرینی حل قیلیش مقصد ده ناقانونی مهاجرلیککه قول اورهدیلر.
هرات مدنی فعاللریدن بیری جواد عمید نینگ افغانستان یشاوچیلریگه قرشی ایران حربیلری نینگ ناتوغری حرکتلریدن تنقید قیلیب ایتیشیچه، ایران دولتی هردایم افغانستان حکومتینی فشار آستیگه قرار بیریشنی ایستهگن حالده، مهاجرلردن قوللنهدی.
هرات ولایتی بوییچه مهاجرلر و باشپناه ایزلاوچیلر ریاستی باشلیغی احمد جاوید نادم نینگ ایتیشیچه، جاری قویاش ییل باشلنگنیدن حاضرگهقدر 300 مینگ افغانستانلیک مهاجر اسلامقلعه یولی آرقهلی افغانستانگه کیلگن.
جناب نادم نینگ کوپهیتیریشیچه، کونده 2 دن باشلب 3 مینگ افغانستانلیک مهاجر اسلامقلعه چیگرهسی آرقهلی مملکتگه قیتهدیلر و بو جملهدن 40% ایران دولتی تامانیدن سورگون ایتیلهدی. اونینگ ایتیشیچه، سورگون ایتیلگنلر آرهسیده سرپرستسیز عیال و بالهلر هم موجود.
بوندن آلدین ایران نینگ هرات ولایتیدهگی قنسولگرلیگی، افغانستان یشاوچیلری حجتسیز حالده ایرانگه بارگن صورتده، اوشبو مملکتدن سورگون قیلینیشینی بیلدیرگن ایدی.
خلق ارا مهاجرلیک تشکیلاتی نینگ معلوماتیگه کوره، سونگی 6 ییل جریانیده افغانستان یشاوچیلری نینگ هر 3 کیشیسیدن بیر تهسی ناقانونی مهاجرلیکنی تجربه قیلگن.
