په افغانستان کې د ملګرو ملتونو سیاسي استازولۍ یا یوناما د عبدالله عبدالله له لوري د ځینو ولایتونو لپاره د والیانو پر ټاکل کېدو ژوره اندېښنه څرګنده کړې ده.
یوناما د یوې خبرپاڼې په خپرولو سره ویلي، ناقانونه کړنې کولی شي چې د سولې په اړه د خلکو هیلې له اندېښنو سره مخ کړي.
یوناما له ښکېلو لوریو غوښتنه کړې ده چې خپلې ستونزې د خبرو له لارې حل او د افغانستان اساسي قانون ته درناوی وکړي.
خبرپاڼه کاږي، په داسې حال کې چې د تاوتریخوالي اوونۍ روانه ده، د هر چا له لوري د زور او یا هم د ناقانونه وسیلې کارول د سولې پروسه زیانمنوي.
دا په داسې حال کې ده چې د ولسمشرۍ ټاکنو وروستۍ پایلې د سلواغې په ۲۹مه اعلان شوې. د ټاکنو خپلواک کمېسیون محمداشرف غني د ولسمشري ټاکنو ګټونکی اعلان کړ، خو د ثبات او همپالنې ټیم دا پایلې ناسمې وبللې او مشر یې عبدالله عبدالله د ټولشموله حکومت د جوړېدو اعلان وکړ.
