تېره شپه د ننګرهار ولایت په نازیانو ولسوالۍ کې د داعشیانو او په ولسي جرګې کې د ننګرهار استازي ظاهرقدیر په مشرۍ ملېشو تر منځ جګړه شوې چې له امله یې دواړو لوریو ته تلفات اوښتي.
دا جګړه د نازیانو ولسوالۍ مورچل سیمه کې شوېده.
نازیانو ولسوالۍ کې د ظاهرقدیر اړوند ملېشو قوماندان ملک دهقان سلام وطندار ته وویل، دې جګړې کې له ۱۰ ډېر داعشیان او د ده دوه ملګري وژل شوي او دغه راز ګڼ داعشیان او ۴ ملېشې ټپیان شوي دي.
ملک دهقان وايي، د تېرې شپې جنګ کې د دوی ملګرو د یوه ترکي په ګډون ۳ داعش هم ژوندي نیولي او ملګرو یې له یوه داعشيانو سر هم پرې کړیدی.
دی وايي، د تېرې شپې د جګړې له امله د وژل شويو داعشیانو جسدونه په سیمه کې پراته دي.
هاخوا د ننګرهار د والي ویاند عطاالله خوګیاڼي سلام وطندار ته وویل، نازیانو ولسوالۍ کې د داعشیانو او ولسي پاڅونوال تر منځ د شوې جګړې له امله ۸ داعشیان وژل شوي او ۳ ژوندي نیول شوي.
نوموړی وايي، دغه جګړه تېره شپه شاوخوا درې بجې شوېده.
دی هم یاده جګړه کې د دوه پاڅونوالو وژل کېدل او د دوو ټپي کېدل مني چې د ټپيانو روغتیايي حالت یې ښه ښودلی.
تر اوسه داعشیانو پهدې اړه څه نهدي ویلي.
