د فراه ولایت سیمه ییز چارواکي وايي، چې د دې ولایت په خاک سفید ولسوالۍ کې وسله والو طالبانو تېره شپه د شمس الرحمان په نوم یو قاضي په دار ځړولی دی.
دغه قاضي د فراه ولایت په استیناف محکمه کې کار کولو.
د فراه د والي ویاند محمد ناصر مهري له سلام وطندار سره په مرکه کې وویل، چې قاضي شمس الرحمان دوه ورځې مخکې د هرات ـ فراه په لار د فراه رود په سیمه کې د وسله والو طالبانو له خوا تښتول شوی و.
د مهري پر خبره، د قاضي جسد ولایتي روغتون ته راوړل شوی دی او پولیسو په دې اړه خپلې څېړنې پیل کړې دي.
د راپورونو پر بنسټ په تېرو ۲۴ ساعتونو کې دا درېیم دولتي مامور دی، چې د وسله والو طالبانو له خوا د صحرايي محاکمې د پرېکړې له مخې وژل کېږي.
تېره ورځ وسله والو طالبانو د فراه ولایت د ملي امنیت یو مامور او د هغه ملګری یې د پشت کوه په ولسوالۍ کې وتښتول، چې له وژلو وروسته یې د دوی جسدونه په خاک سفید ولسوالۍ کې په دار وځړول.
په ورته وخت کې د فراه خلک وايي، چې خاک سفید ولسوالۍ د وسله والو طالبانو په امن ځای او د محاکمو په سیمه بدله شوې.
دوی په حکومت نیوکه کوي او وايي، چې تر اوسه په دې ولسوالۍ کې د طالبانو د له منځه وړلو له پاره هېڅ اقدام نه دی شوی.
