اجراييه ریاست وايي، د ناروې د بهرنيو چارو وزارت مرستيال ورته ويلي چې د سولې په تړاو د بينالافغاني خبرواترو کوربهتوب ته چمتو دي.
له ياد ریاسته په خپره شوې خبرپاڼه کې راغلي چې د ملي يووالي حکومت اجراييه رييس عبدالله عبدالله د ناروې د بهرنيو چارو وزارت له مرستيال اودن هالورسن سره ليدلنه کې ويلي چې سوله د افغانستان د حکومت لومړيتوب دی.
نوموړي د هېواد له ټولو سياسيونو غوښتي چې په دې برخه کې له فرصته پوره ګټه واخلي.
خبرپاڼه زياتوي، د ناروې د بهرنيو چارو وزارت مرستيال چې د نن د امريکا او طالبانو ترمنځ د سولې هوکړه لاسليک کېږي راغلی او ويلي يې دي چې هېواد يې د بينالافغاني مذاکراتو کوربهتوب کوي.
اودن هالورسن، له عبدالله عبدالله سره په لیدنه کې ویلي، ټول مذاکره کوونکي لوري باید له بدلونونو سره په تدبیر برخورد وکړي او د سولې لاسته راغلیو فرصتونو نه ګډه استفاده وکړي.
ټاکل شوې د قطر په دوحه کې د امریکا او طالبانو ترمنځ د سولې هوکړه لاسلیک شي او بیا ترې لس ورځې وروسته بينالافغاني مذاکرات پيل شي.
