ناتو تشکیلاتی باش کاتبی ینس استولتنبرگ نینگ غنی و عبدالله آرهسیده بولگن سیاسی کیلیشوونامه امضالنگنی توغریسیده ایتیشیچه، بو تشکیلات افغانستان رهبرلری نینگ تارتیشوولری حل ایتیلیشی و همهشمول بیر حکومت تشکیل ایتیلیشی خصوصیده آلگن قرارلرینی خوش قرشیلیدی.
شونینگدیک، اونینگ ایتیشیچه، کرونا ویروس کینگ شکلده رواجلنگنی و افغانستان یشاوچیلری گه قرشی طالبان گروهی نینگ دواملی زوروانلیکلریگه قرهگنده، افغانستان رهبرلری نینگ بیرلیک و بیردملیکلری باشقه هر زماندن کوره اهمیتلی دیر.
ناتو باش کاتبی، طالبان گروهی دن زوروانلیکلرینی کمهیتیریش خصوصیده، بیرگن سوزلریگه عمل قیلیشینی سورهگن. «بیزلر طالبان دن بیرگن سوزلریگه عمل قیلیب و زوروانلیکلرینی کمهیتیریب افغانستانلیکلر ارا سوزلشوولرده اشتراک قیلیشینی طلب قیلهمیز و شونینگدیک، بوتون افغانستان یشاوچیلری نینگ منفعتلرینی تأمین قیلهدیگن تینچلیک اوچون حقیقی یرهشیشلرینی کورسهتیشی کیرهک.»
ناتو برچه طرفلردن تینچلیک اوچون وجودگه اساسی فرصت دن فایدهلنیشلرینی طلب قیلگن.
جناب استولتنبرگ نینگ ایتیشیچه، «بیزلر زوروانلیکلر یکونلنیشی، عیاللر شامل افغانستان یشاوچیلری نینگ برچهسینی انسان حقوقلری سقلنهدیگن، قانون حاکمیتی و تروریستلرنینگ باشپناهلری نابود ایتیلیشی گه سبب بولهدیگن اساسی بیر کیلیشووگه احتیاج میز.»
اونینگ اورغولشیچه، ناتو بیرلشیکلری و اوشبو تشکیلات نینگ باشقه همکارلری، کیسکین حمایهوی کوچلرنینگ تعلیماتی مأموریتی و مالی حمایتی آرقهلی افغانستانده اوزون مدتلی تینچلیک و برقرارلیک تأمینلنیشی خصوصیده بیرگن سوزلری گه قرارلی دیر.
آمریکا تشقی ایشلر وزیری مایک پومپئونینگ اوز توییتر صحیفهسیده یازیشیچه، همهشمول بیر حکومت تشکیل ایتیلیشی اوچون غنی و عبدالله آرهسیده سیاسی کیلیشوو امضالنگنیدن خرسند دیر.
اونینگ ایتیشیچه، آمریکا، افغانستان تینچلیک تأمینلنیشی خصوصیده بولهدیگن ایش اوچون غنی و عبدالله نینگ قرارینی خوش قرشیلیدی.
شونینگدیک، افغانستان تینچلیک لایحهسی بوییچه آمریکانی خاص نمایندهسی زلمی خلیلزاد، غنی و عبدالله نینگ آرهسیده بولگن سیاسی کیلیشوونی خوش قرشیلب ایتیشیچه، حاضرگی حکومت تینچلیک جریانیده جناب عبدالله دن «مخلصانه» شکلده حمایت قیلیشی کیرهک.
خلیلزادنینگ اوز توییتر صحیفهسیده یازیشیچه: «حاضر ایسه تارتیشوولر یکونلنیشی اوچون افغانستان اهالیسی و دنیانینگ ارادهسی جدی آلینیشی کیرهک. داکتر عبدالله تیزلیک بیلن حرکت قیلیشی لازم و بو ایش ده حاضرگی حکومت تامانیدن «مخلصانه» شکلده حمایت قیلیسین.»
افغانستان تینچلیک لایحهسی بوییچه آمریکانی خاص نمایندهسی نینگ کوپهیتیریشیچه، غنی و عبدالله ملی بیرلیک حکومت زمانیده بولگن خطالرنی تکرار قیلمسلری کیرهک.
عین دمده، افغانستان بوییچه بیرلشگن ملتلر تشکیلاتی نینگ نمایندهلیک دفتری یا-ده یوناما، بیر اعلامیه آرقهلی محمداشرف غنی و عبدالله عبدالله نینگ آرهسیده بولگن سیاسی کیلیشوونی ایجابی آدیم بیلیب و امید بیلدیریشیچه، بو ایش ایکی رهبرگه افغانستان نینگ کته قیینچیلیکلرینی حل قیلیش خصوصیده، فرصت بیرهدی.
شونینگدیک، ایران تشقی ایشلر وزیری محمدجواد ظریف، غنی و عبدالله بیلن اوتکزگن تلیفونی سوزلشووده «ملی مصالحه جریانیده وجودگه کیلگن کیلیشمه نی» خوش قرشیلب ایتیشیچه، مملکتی طالبان شامل افغان گروهلری آرهسیده یرهشیش جریانیدن حمایت قیلیش گه تیار دیر.
شوندهی بیرحالده، هند، کانادا و ترکیه اعلامیهلر نشر قیلیب افغانستان رهبرلری نینگ آرهسیده سیاسی کیلیشوو امضالنگنینی خوش قرشیلشگن.
عین دمده، قطرده طالبان گروهی نینگ سیاسی دفتری سوزلاوچیسی سهیل شاهین، غنی و عبدالله نینگ آرهسیده بولگن کیلیشووگه عکسالعمل ایتیشیچه: «کابل ده بولگن ایش سابق ده ناکام بولگن تجربه تکرارلنیشی دیر.»
سهیل شاهین نینگ اوز توییتر صحیفهسیده یازیشیچه، اصلی قیینچیلیک دوحه کیلیشوونامهسی عمل گه آشیریلمهگنی دیر. «محبوسلرنی قوییب یوباریش جریانی یکونلنیب و تیزلیککه افغانستانلیکلر ارا مذاکره باشلهنیشی کیرهک.»
جمهور رئیس محمداشرف غنی و عبدالله عبدالله نینگ آرهسیده بولگن سیاسی کیلیشوو اوچ آی جنجلدن سونگ، اوتگن کون «یکشنبه، 28- ثور» ایکی تامان نینگ آرهسیده امضالندی.
اوشبو کیلیشوونامه اساسیده، عبدالله عبدالله ملی مصالحه عالی کینگشی نینگ باشلیغی و شونینگدیک، کابینه نینگ 50% گه سهمدار بولهدی.
