له اداري فساد سره د مبارزې د څارنې او ارزونې ګډې خپلواکې کمېټې یا مېک د ۱۳۹۶ کال په لړم میاشت کې د فساد له لوري د پوهنې وزارت زیانمننې په اړه راپور خپور کړی و.
په یاد راپور کې د فساد له پلوه د پوهنې وزارت د تشو او کمزورتیاوو په نښه کېدو تر څنګ، په دغه وزارت کې د اصلاحاتو لپاره ۱۱۳ سپارښتنې هم په ګوته کړې وې.
د دې کمېټې مسوولانو نن د خپل نوي راپور په خپرولو سره وویل چې د پوهنې وزارت او نور همکاران یې نهدي توانېدلي د دوی ۱۱۳ سپارښتنې په بشپړه توګه پلې کړي.
د یادې کمېټې څېړونکی حسین رضایي وایي، له ۱۱۳ سپارښتنو یې ۱۶ په بشپړه توګه عملي شوي چې تر ډېره د ښوونکیو ګومارنې په اړه دي او ۱۶ نورې یې ۵۰ سلنه پلې شوې دي.
د رضایي په وینا، که څه هم د دوی په سپارښتنو کې د پوهنې وزارت د تشکیل بیاکتنه او کمول، د ښځو ګډون زیاتول، د کړنلارو بیاکتنه او جوړول، د ګومارنې په بهیر کې روڼوالی او د دغه بهیر برېښنایي کول شامل دي، خو په وینا یې، په پوهنې وزارت کې لا هم د اصلاحاتو مخنیوی کېږي.
دغه راز له اداري فساد سره د مبارزې د څارنې او ارزونې ګډې خپلواکې کمېټې رییس باري سلام وایي، د دوی د سپارښتنو په درېیم پړاو کې د یادو سپارښتنو له ډلې ۱۵ یې تر ۲۵ سلنې پرمختګ کړی دی.
اړوند مطالب:
د «مېک» راپور: په کورنیو چارو وزارت کې فساد
د سلام په وینا، د پوهنې وزارت د لوست کتابونو او مسلکي ښوونکیو د کموالي، د زورواکیو لاسوهنې او د زده کوونکیو د ناسوبتیا له ننګونو سره مخ دی او په وینا یې، یاد وزارت د دوی د ۱۱۳ سپارښتنو له ډلې پر ۳۸ یې کار پیل شوی، ۶ یې لا پر ځای پاتې دي او ۲۲ نورې هم ځنډېدلې دي.
سلام وایي، له اداري فساد سره د مبارزې د څارنې او ارزونې ګډې خپلواکې کمېټې موندنې ښیي چې په پوهنې وزارت کې له فساد سره د مبارزې هڅوونکې ژمنه شته.
د سلام په وینا، د وزارت د تشکیل کمول، د سازماني مطالعې پیلېدل، د مرکزیت کمول، د معالوماتو د مدیریت ښه کول او د پوهنې وزارت په مشرتابه پلاوي کې د ښځو حضور زیاتوالی، هغه مهم اقدامات دي چې د فساد کمولو او اصلاحاتو په موخه باید وشي.
