افغان ولسمشر محمد اشرف غني د تاجکستان د ولسمشر امام علي رحمان په رسمي بلنه، نن سهار سه شنبې د (می پر ۱۰مه) د یو لوړ پوړي دولتي پلاوي په مشرۍ په دوه ورځني رسمي سفر پلازمېنې دوشنبې ته ولاړ.
د ولسمشرغني د ویاند مرستیال دواخان مینه پال له سلام وطندار سره په مرکه کې وویل، ولسمشر به تاجکستان ته په دې دوه ورځني سفر کې د دې هېواد له ولسمشر امام علي رحمان سره په دوه اړخیزو دایمي همکاریو خبرې وکړي.
د ده په خبره، افغان ولسمشر او ورسره تللی پلاوی به په دې خبرې وکړي، چې په افغانستان او تاجکستان کې له موجودو اقتصادي فرصتونو څه ډول استفاده وکړي.
مینه پال همداراز وویل، د ولسمشر غني په مشری تللی پلاوی به د افغانستان او تاجکستان پر امنیتي حالت او په امنیتي برخه کې د همکاریو او په ټوله کې د سیمې د امنیتي وضعیت په ښه کولو خبرې وکړي.
د ده په وینا، د دواړو هېوادونو د ولسمشرانو ترمنځ به د یو لړ همکاریو تړون هم لاسلیک شي او له دې سفر نه وروسته به اجرایوي رییس ډاکټر عبدالله عبدالله له خوا په نږدې راتلونکې کې د (کاسا ۱۰۰۰) پروژې پرانیسته وشي.
د مینه پال په نظر، افغان ولسمشر به په دې دوه ورځني رسمي سفر کې د تاجکستان له لومړي وزیر او همدارنګه د ولسي جرګې له رییس سره هم په جلا جلا کتنو کې د دواړو هېوادونو تر منځ د اړیکو د پراختیا او همکاریو په اړه غونډې وکړي.
له ولسمشرۍ ماڼۍ نه په خپره شوې خبرپاڼه کې راغلي، ولسمشر غني به د تاجکستان ملي پوهنتون کې استادانو او محصلانو ته وینا وکړي.
له افغان ولسمشر سره په دې سفر کې د بهرنیو چارو وزیر صلاح الدین رباني، د اوبو او انرژي وزیر علي احمد عثماني، لوی څارنوال فرید حمیدي او د افغانستان د برېښنا شرکت رییس قدرت الله دلاوري ملګري دي.
