د بهرنیو چارو وزارت نن په کابل کې د خبري ناستې پر مهال په دغه وزارت کې د یوې نوې اصلاحي طرحې خبر ورکړ.
د بهرنیو چارو وزارت سرپرست ادریس زمان وايي، د بهرني سیاست په دستګاه کې بدلون راوستل د کارکوونکیو او ډیپلوماټانو د ګومارنې ډول، د کاري پروسې بدلول او د کونسلي خدمتونو وړاندې کولو لپاره د اسانتیاوو برابرول د دغې طرحې بنسټیز محور جوړوي.
د نوموړي په وینا، د بهرنیو چارو وزارت په ډیپلوماټیکه دستګاه کې به ۱۰۰ بستونه راکم شي چې په پایله کې به یې شاوخوا یو میلیارډ افغانۍ دولتي لګښتونه هم وسپمول شي.
ادریس زمان وايي، د دغه وزارت څلور معینیتونه او دوه ریاستونه هم د دغې نوې اصلاحي طرحې له مخې سره یوځای کېږي او د کارکوونکیو د خدمت دوره به هم له ۴۰ کلونو نه ۳۵ ته را ښکته شي.
په همدې حال کې د بهرنیو چارو وزارت اقتصادي مرستیال میرویس ناب وايي، د افغانستان په ډیپلوماټیکه دستګاه کې کمښت راوستل د دغې دستګاه د اغېزمنتوب او همکاریو ډېرولو لپاره یوه جدي اړتیا ګڼل کېده او د دغې طرحې په عملي کېدو سره به دغه وزارت تر ډېره غیرسیاسي او لازمه روڼتیا به پهکې راشي.
اړوند مطالب:
د بهرنیو چارو وزارت ۴۰۰ کارکوونکي په اړیکو ګومارل شوي
د کورنيو او بهرنیو چارو وزارتونه په قومپالنه او فساد اخته دي
