میدان وردک ولایتی‌نینگ والیسی حیات‌الله حیات‌نینگ ایتیشیچه، ولایت‌نینگ جلریز ولسوال‌لیگی‌ده محلی پولیس‌گه ییتکزیلگن آغیر تلفات، ولایت‌ده ییرلشگن ملی کوچلرنینگ تفاوت سیزلیگی‌دن کیلیب چیققن.
اوتگن هفته چهارشنبه کونی میدان وردک ولایتی‌نینگ جلریز ولسوال‌لیگی‌ده افغان ملی کوچلری و طالب‌لر اورته‌سیده یوز بیرگن قوراللی اوروش‌ده ملی کوچلرنینگ 24 نفری طالب‌لر ارقه‌لی قربان ایتیلدی. اوشبو حربی‌لر ساعت‌لب مقاومت قیلگنی ایتیله‌دی. ایتیلیشیچه، 200 متر اوزاق‌لیک‌ده جایلشگن نظم عامه پولیسی‌دن هم هیچ قنده‌ی یاردم قول‌گه کیریتمه‌گن‌لر.
شونینگ‌دیک بولرنینگ مرکز کابل و ولایت امنیه قوماندان‌لیگی‌دن یاردم سوره‌گن‌لیک‌لری هم جواب سیز قالگن. ایتیلیشیچه، مذکور حربی‌لر بوتونلی اولدیریلگن‌دن سونگ محل‌گه کومک ییتکزیلگن.
بوگون بیر خبری انجمن‌ده سوزله‌گن میدان وردک والیسی‌گه کوره، امنیتی کوچلر مذکور اولسوال‌لیک‌که قوراللی طالب‌لر هجوم قیلیشی توغریسی‌ده خبرلری بولگن؛ اما مذکور حربی‌لر اورته‌سیده هماهنگ بولمه‌گن‌لیگی سبب طالب‌لر 12 پوسته‌نی تصرف قیلیش‌گه موفق بولیب، ملی کوچلردن تشقری 9 نفر تینچ اهالی‌نی اولدیرگن‌لر.
شونینگ‌دیک ارووش‌ده طالب‌لرگه هم تلفات ییتکزیلگن. گزارش‌لرده ایتیلیشیچه، جنگری‌لرنینگ 40 نفری جلریز ولسوال‌لیگی‌ده‌گی اوروش‌ده نابود ایتیلگن.
سلام وطندارگه سوزله‌گن حیات‌الله حیات، حادثه مرکزی حکومت آرقه‌لی جدی تیکشیریلشی‌نی سوره‌گن.
اوروش اوز پایانیگه ییتگن‌دن سونگ افغانستان ایچکی ایش‌لر وزیری نورالحق علومی بیر هیت رهبرلیگی‌ده بو ولسوال‌لی‌که سفر قیلدی.
سفردن سونگ سوزله‌گن جناب علومی، طالب‌لر تامانیدن تصرف ایتیلگن برچه منطقه‌لر قیته‌دن ملی کوچلر آرقه‌لی تصرف قیلینگن لیگینی ایتیب، کابل و بامیان عمومی یولی ترافیک یوزیگه آچیلگن لیگینی بیلدیرگن.
جلریزده ملی پولیس کوچلری‌گه ییتکزیلگن آغیر تلفات، همده مساله اوچون ملی کوچلرنی تفاوت‌سیز قالگنی اوچون مملکت بویلب عکس العمللرگه روپه‌ره بولدی. اوروش‌ده اولدیریلگن ملی پولیس‌لرنی توپراققه تاپشیریش مراسم‌ده سوزله‌گن اجراییه ریاستی‌نینگ ایکینچی اورین باسری محمد محقق، قضیه جدی تیکشیریلیشی حقیده تاکیدله‌گن.
جناب محقق، جلریز حادثه‌سی « مزار، بامیان و یکاولنگ» واقعه‌سی تکرارلندی دیگن. او، حادثه صلاحیت‌لی هیات تامانیدن هر تامانلمه تیکشیریلیشی نی سوره‌گن.
ایتیلیشیچه، هنوز قوراللی طالب‌لر موجود بولگن جلریز ولسوال‌لیگی‌نینگ بعضی منطقه لریده تازه‌لش حربی عملیات‌لر دوامی بار. شونینگ‌دیک بو ولسوال‌لیک بوتونلی قوراللی طالب‌لردن تازه‌له‌نیش اوچون ینگیدن 300 حربی قوشین یوباریلگنی ایتیله‌دی.
عملیات نتیجه‌سیده هنوزگچه 5 قیشلاق جنگری لردن تازه‌له‌نیب، 17 کیشی اولدیریلگن.
عین‌حالده، اوز نامی فاش ایتیلیشی‌نی ایستمه‌گن بیر منبع‌نینگ ایتیشیچه، عملیات‌ده محلی پولیس‌نینگ اون عسکری هلاک بولگن. اما، طالب‌لر سوزلاووچیسی ذبیح‌الله مجاهدگه کوره، اوروش‌ده محلی پولیس عسکرلریدن 30 ته‌سی اولدیریلگنی و 12 پوسته طالب‌لر تصرفی‌گه اوتگن‌لیگینی ادعا قیلگن.
