د افغانستان ولسمشر محمداشرف غني پرون ناوخته د مونیخ امنیتي کنفرانس په څنډې کې په جلا جلا غونډو کې د ناټو سازمان سکرتر جنرال ینس سټولټنبرګ، د اروپایي ټولنې د بهرنیو اړیکو مسوولې مېرمن فدریکا موګریني، د برتانیا د دفاع وزیر ګاوین ویلیامسن، د قطرامیر اعليحضرت شیخ تمیم بنحمد آلثاني او په بهرنیو چارو کې د متحده عربي اماراتو د دولت وزیر ډاکټر انورمحمد قرقاش سره د سولې، د ترهګرۍ پر ضد د مبارزې او ګڼو نور موضوعاتو په اړه خبرې وکړې.
ولسمشر غني او جنرال سټولټنبرګ د افغانستان د حکومت په رهبرۍ او مالکیت د سولې پروسې، د ترهګرۍ ضد ګډې مبارزې او پهدې برخه کې د سیمې د هېوادونو د صادقانه رول په اړه بحث وکړ.
پهدې کتنې کې د ناټو سازمان سکرتر جنرال وویل، ناټو سازمان او د هغه غړي او همکار هېوادونه له افغانستان سره خپلو همکاریو ته ژمن دي.
ښاغلي ینس ستولتنبرګ په ټینګار سره وویل د افغان حکومت له رهبرۍ او مالکیت پرته سوله ناشونې ده.
په ورته مهال ښاغلي غني وویل، په نږدې راتلونکي کې به د سولې مشورتي لویه جرګه جوړه او په هغې کې به د هېواد د ټولو ولایتونو استازي د سولې په اړه مفصل بحثونه وکړي.
د سولې مشورتي لویه جرګه، ټاکنې او د کابل پروسې غونډه
افغان ولسمشرغني او د اروپایي ټولنې د بهرنیو اړیکو مسوولې او ځانګړې استازې مېرمن فدریکا موګریني پرون ماښام په مونیخ ښار کې د کابل پروسې د ناستې، د سولې مشورتي لویې جرګې، ټاکنو او نورو مسایلو په اړه بحث او خبرې وکړې.
اغلې موګریني وویل، اروپایي ټولنه د افغانستان د سولې پروسې ملاتړ کوي او د سولې پروسې د توافقتنامې د تطبیق په هر پړاوو کې هر ډول همکارۍ ته چمتو دي. هغې زیاته کړه، اروپایي ټولنه د ټاکنو په برخه کې له افغانستان سره هر ډول همکاریو ته چمتو ده.
ښاغلي همکاریو ته د چمتووالي او له افغانستان سره د همکاریو په برخه کې د اروپایي ټولنې د همکاریو او رغنده رول مننه وکړه او په سیمه کې د سولې د تامین لهپاره یې د اروپایي ټولنې رغنده رول ارزښتناک وبللو.
برتانیا د افغانستان سراتيژیک ملکری دی
محمداشرف غني د برتانیا د دفاع وزیر ګاوین ویلیامسن سره د افغانستان او سیمې د امنیت د تامین او د ترهګرۍ ضد ګډې مبارزې په اړه بحث وکړ.
د برتانیې د دفاع وزیر وویل، هېواد به یې د ستراتیژیک ملګري په توګه د افغان حکومت او خلکو ترڅنګ پاتې شي او همدارنګه یې ښاغلي غني ته له افغانستان سره د دوامدارو همکاریو ډاډ ورکړ.
افغان ولسمشر له افغانستان سره د برتانیې د همکاریو قدرداني وکړه او ويې ویل، د افغانستان امنیتي او دفاعي ځواکونه ـ چې له ترهګرۍ سره د مبارزې لومړۍ کرښه کې قرار لري ـ د افغانستان، سیمې او نړۍ د امنیت او ثبات لهپاره مبارزه کوي.
د افغانستان او قطر ترمنځ د اړیکو لا پراختیا
افغان ولسمشر پهدې کنفرانس کې د قطرامیر اعليحضرت شیخ تمیم بن حمد آلثاني سره د افغانستان او قطر ترمنځ د اړیکو د لا پراختیا په اړه مفصلې خبرې وکړې.
ده هم د افغان حکومت په رهبرۍ او مالکیت د سولې پروسې ملاتړ وکړ.
ولسمشر غني د افغان حکومت په رهبرۍ او مالکیت د سولې پروسې نه د قطر د ملاتړ قدرداني وکړه او وې ویل، افغانان د ۴۰ کلن بحران د پای ته رسېدو په انتظار دي.
د افغان حکومت په رهبرۍ د سولې پروسې په باب همکاري
افغان ولسمشر اشرف غني بېګا مونیخ ښار کې په بهرنیو چارو کې د متحده عربي اماراتو د دولت وزیر ډاکټر انورمحمد قرقاش سره د افغانستان د سولې پروسې او په سیمه کې د ترهګرۍ پر ضد ګډې مبارزې په اړه نظریات تبادله کړل.
ښاغلي قرقاش وویل، هېواد یې د افغان حکومت په رهبرۍ او مالکیت د سولې پروسې په برخه کې هر ډول همکارۍ ته چمتو دی.
ښاغلي غني د افغان حکومت په رهبرۍ او مالکیت د سولې پروسې نه د متحده عربي اماراتو د ملاتړ او مثبت رول مننه وکړه.
افغان ولسمشر تېره ورځ د مونیخ کنفرانس په څنډې کې د ترکیې له دفاع وزیر هلوسي اکار او د اوزبیکستان د بهرنیو چارو وزیر عبدالعزیز کاملوف تر څنګ د افغانستان د سولې لهپاره د امریکا د ځانګړي استازي زلمي خلیلزاد سره هم په ډېرو موضوعاتو خبرې کړېوې.
دا کنفرانس به سبا ورځ هم دوام ولري او ښايي ولسمشر غني پهکې د ګڼو هېوادونو له لوړپوړیو چارواکیو سره د سولې، امنیت او ترهګرۍ پر ضد د مبارزې په اړه وغږېږي.
ورته مطالب:
ناټو: تر اوسه له افغانستانه د وتلو پرېکړه نهده شوې
