هرات و فراه ولایتلریده طالبان گروهی تامانیدن اویوشتیریلگن هجوملر نتیجهسیده امنیتی کوچلردن بیرقطاری هلاک ایتیلگن. هرات ولایتیده آتی فاش ایتیلیشینی ایستمهگن دولتی بیر منبع نینگ سلاموطندارگه ایتیشیچه، مذکور ولایت نینگ گلران تومنی اوستیگه طالبان گروهی تامانیدن اویوشتیریلگن هجوم نتیجهسیده 8 پولیس هلاک و باشقه 16 پولیس یرهلنگن.
گلران تومنی یشاوچیلریدن بیرقطاری و نمایندهلر کینگشی نینگ سابق اعضاسی محمدعارف طیب هم امنیتی کوچلردن بیرقطاری هلاک ایتیلیب و یرهلنگنینی تصدیقلگن.
هرات حاکمی عبدالقیوم رحیمی نینگ ایتیشیچه، بو هجوم ده امنیتی کوچلر و طالبان گروهی هم قربانلیک بیرگن، بیراق امنیتی کوچلردن هلاک ایتیلگنلرنینگ رقمی حاضرگهقدر معلوم بولمهگن.
طالبان گروهی بیر خبرنامه ترقهتیب ادعا قیلیشیچه، بو هجوم نتیجهسیده گلران تومنی مرکزی ده ایکی پوستهنی نظارت گه آلیب، 12 پولیسنی اولدیریب و باشقه 8 پولیسنی یرهلنتیرگن.
بیراق، هرات پولیسی نینگ ایتیشیچه، بو هجومده بیر پولیس و 10 طالب هلاک ایتیلگن.
باشقه تاماندن، فراه شهری گه تیگیشلی بیر پوسته اوستیگه مذکور گروه تامانیدن اویوشتیریلگن هجومده 3 پولیس هلاک ایتیلگن.
فراه ولایت کینگشی اورین باسری شاهمحمود نعیمی نینگ ایتیشیچه، امنیتی کوچلر و طالبان گروهی آرهسیده یوز بیرگن آتیشمه بوگون ایرتهلب گچه دوام قیلگن و بو گروه باشقه 4 پولیسنی توتقونگه آلگن. فراه پولیسی بو توغریده هیچ نرسه دیمهیدی، بیراق طالبان گروهی نینگ ادعاقیلیشیچه، بو هجومده 5 پولیسنی اولدیریب و باشقه 5 پولیسنی توتقونگه آلگنلر.
