وانتوایگل نورستان ولایتی نینگ مرکزی تومنلریدن بیری دیر و بو تومن کنر ولایتی نینگ مانوگی تومنی یقینیده جایلشگن. شونینگدیک، مذکور تومن گه کیریش یولی کنرنینگ مانوگی تومنیدن اوتهدی. بو ییرده داعش گروهی سونگی کونلر فعالیتینی کینگهیتیرگن.
عین حالده، رسمیلرنینگ ادعا قیلیشیچه، داعش گروهی کنرنینگ مانوگی و چپهدره تومنلریده قتهغن قیلینگن و بو گروه باشقه تومنلرده فعالیتلرینی کینگهیتیره آلمهیدی، بیراق نورستان ولایتی نینگ وانتوایگل تومنی اهالیسی نینگ خواطر بیلدیریشیچه، داعش گروهی بو تومن گه یول تاپگن صورتده، کیریش یوللرنی باغلب و قولیلیک بیلن بو تومن نی باسیب آلهدی.
وانتوایگل تومنی بوندن آلدین نیچه مرته طالبان گروهی نینگ نظارتی گه اوتگن و حاضر مذکور تومن اهالیسی بو تومن داعش گروهی نینگ قولی گه سقوط قیلیشی دن خواطر بیلدیریشهدی.
وانتوایگل تومنی اهالیسی نسیم نینگ ایتیشیچه، کنرنینگ مانوگی و چپهدره تومنلریده داعش گروهی اهالی گه کوپلب مالی زیان ییتکیزگن و بو گروه وانتوایگل گه یول تاپگن صورتده، اهالی کوپینچه قیینچیلیکلرگه دوچ کیلهدی.
وانتوایگل تومنی نینگ کیریش یولی بوندن آلدین هم ناتینچ ایدی، بیراق نظمعامه کوچلری نینگ عملیاتی و بو یولده امنیتی پوستهلر ایجاد ایتیلگنیدن سونگ، بو یولدن باریب و کیلیش دوام ایتماقده.
مملکت شرقیده نظمعامه کوچلرینینگ 7- لواسی قومندانی نصیراحمد ساپی نینگ ایتیشیچه، داعش گروهی کنر ولایتی نینگ مانوگی و چپهدره تومنلریده مغلوب ایتیلگن و اولر بو گروه اوچون باشقه منطقهلرده فعالیت قیلیش گه رخصت بیرمهیدی.
جناب ساپی نینگ کوپهیتیریشیچه، داعش گروهی وانتوایگل تومنی نینگ یولینی ناتینچ قیله آلمهسی گه علاوه، بو تومن گه کیره آلمهیدی.
شونینگدیک، باشقه بیر خواطرگه کوره، داعش گروهی نورستان تاماندن غزنی ولایتی گه نفوذ قیلگن صورتده، حکومت و چیتایللیک کوچلر کوپینچه قیینچیلیککه روپهره بولیشی ممکن.
