افغانستان حکومتی 2015- ییلدن کیین هم امریکهلیک حربی قوشینلر بو مملکتده قالیشینی خوش قرشیلب بو ایسه دنیانینگ افغانستان کیلهجگی برابریده بیرگن وعدهسینی کورستهدی دیگن.
امریکه جمهور رییسی بارک اوباما اوتگن هفته سهشنبه 21- میزان مملکتی ماموریتینی افغانستانده 2016- ییلدن کیین کوپیتیردی. جناب اوبامانینگ ایتیشیچه، 9800 حربی عسکر 2016- ییل پایانیگه قدر افغانستانده قالیشی کوتیلهدی و 2016-ییلدن سونگ خلق ارا کوچلرینینگ سانی 5500گه کمیتیریلهدی.
جمهور رییسلیک سرایی سوزلاووچیسینینگ اورین باسری سید ظفر هاشمی کابل مقابلیده واشنگتننی تعهدی منطقهده افغانستان موضوعی حق بولگن لیگینی ثابت قیلدی دیگن.
بوگون (سهشنبه) جمهور رییس سوزلاووچیسینینگ اورین باسری کابلده بیر خبری ییغینده حکومت و افغانستان خلقی منطقهوی ترورچیلیک بیلن دوچار دیگن. جناب هاشمیگه کوره، افغانستاندهگی جاری اوروش دنیا و منطقه وی بُعدی بولگنلیگینی دنیا بیلیشی کیرهک و دنیا بو اوروشده افغانستان بیلن همکار بولیشی لازم.
اجراییه ریاستی سوزلاووچیسینینگ معاونی جاوید فیصل سلام وطندار بیلن قیلگن صحبتده افغانستان حکومتی امریکه جمهور رییسی نینگ 2016- ییلدن کیین هم خلق ارا حربی عسکرلر مملکتده قالیشینی خوش قرشیلیدی و بو قرار ایسه اوتگن اون تورت ییل ایچیده قولگه کیریتیلگن یوتوقلر سقلهنیشی اوچون ایجابی تاثیری بار.
اجراییه ریاستی سوزلاووچیسی اورین باسرینینگ تاکیدقیلیشیچه، هنوز هم تشقی همده ایچکی ترورچیلر افغانستان حکومتی برابریده اوروش قیلهدی و حاضرگی کونده افغان ملی کوچلری یانیده خلق ارا کوچلر موجودلیگی بیر احتیاج دیر.
اما افغانستان سابق جمهور رییسی حامدکرزی بیر اعلامیه نشر قیلیب ایتیشیچه، بو مملکتده امنیت حقیقی روشده تامینلنگن حالده، افغانستان خلقی خارجی کوچلر حضورینی قبول قیلهدیلر دیگن.
جناب کرزینینگ مذکور اعلامیه ده معلوم قیلیشیچه، امریکه حربی کوچلرینینگ افغانستانده قالیشی ملی بیرلیک حکومتی همده مملکت خلقیگه زیان ییتکیزمسلیگی شرط، عکس حالده خارجی کوچلرنینگ موجودلیگی باشقه معنانی انگلتهدی.
عین حالده، افغانستان مدافعه وزیرلیگی علاقهلر ریاستینینگ اورین باسری حبیبالرحمن افضل، امریکه حربی کوچلرینینگ افغانستانده قالیب ملی کوچلرنی حمایت قیلیب حربی تیارگرلیکدن اوتکزیش، مصلحت بیریش و آرقهداشلیک قیلیشی مملکت اوچون ایجابی تاثیری بار دیگن.
حربی تحلیلچی عتیقالله امرخیلگه کوره، بارک اوبامانینگ اخیر آلگن قراری هنوز هم دنیا جماعهچیلیگی افغانستاننی ایسدن چیقارمهگنلیگینی انگلتهدی.
ایتیلیشیچه، بوندن بویان امریکهلیک حربی قوشینلر افغانستان ملی کوچلرینی حربی ساحهده تیارلش، اولرگه مصلحت بیریش همده القاعده ترور ترماغیگه قرشی کورهشیش اوچون همکارلیک قیلهدی.
