مملکت شمالی‌ده کیله‌سی بیش ییل‌گچه 75 مینگ عیال «عیال‌لر رهبرلیگی و کینگتیریش» برنامه‌سی آرقه‌لی امیریکه قوشمه ایالت‌لری کینگتیریش اداره‌سی (USAID) یاردمی اساسیده تعلیم کوره‌دی.
بلخ ولایتی عیال‌لر تعلیمی مرکزی مسوولی حفیظه میرزایی‌نینگ ایتیشیچه، شنبه کون مزارده ایش‌گه باشله‌گن عیال‌لر کوچلنیشی و اورگه‌تیش بولیم توغری‌سیده بولگن لایحه، بلخ شامل مملکت بیش ولایتی‌ده عمل‌گه آشیریله‌دی.
خانم میرزایی‌گه کوره، عیال‌لر رهبرلیگی، عایله‌وی اقتصاد یوقاری کوتریلیشی و حکومت اداره‌لریده عیال‌لرگه قنقه سهمیه بیریش بولیم‌لریگه بو لایحه آرقه‌لی تعلیم بیریله‌دی. شونینگ‌دیک عیال‌لر وضعیتی یخشی‌لنیشی و عیال‌لردن حمایت ایتووچی گروه تشکیل ایتیله‌دی.
اونینگ ایتیشیچه، یالغیز بلخ ولایتی‌ده 25 مینگ عیال بو لایحه‌گه شامل بوله‌دی و بو لایحه‌دن مقصد عیال‌لر ظرفیتی کوچلنیشی و اولرگه دولتی اداره‌لرده سهمیه بیریش بولگن.
پارلمان اعضاسی محمد عبده، عیال‌لر وضعیتی یخشی‌لنیشی خصوصیده اوشبو مرکز ایجاد ایتیلیشینی مناسب بیلیب و مذکور لایحه‌گه شامل بوله‌دیگن عیال‌لردن یخشی صورتده ایش آلیش‌لرینی سوره‌دی.
جناب عبده‌نینگ ایشانچی‌گه کوره، عیال‌لر بو لایحه فعالیت‌لری‌نی تیکشیره آله‌دی و اولرنینگ وضعیتی حاضرگی شرایط ده یخشی بوله‌دی.
پارلمان‌نینگ اوشبو اعضاسی، بو لایحه‌نی یولگه قویه‌دیگن کیشی‌لردن عیال‌لر اوچون یخشی صورتده فعالیت قیلیش‌لرینی سوره‌دی.
عین حالده، بلخ‌ده بیرقطار عیال‌لرنینگ ایتیشیچه، اوتمیش‌لرده‌هم عیال‌لردن حمایت ایتووچی لایحه‌لر عمل‌گه آشیریلگن؛ بیراق حاضرگچه عیال‌لر کوپینچه قیین‌چیلیک‌لر بیلن روپه‌ره بولیب تورگن‌لر.
اولرنینگ ایتیشیچه، عیال‌لر کوچلی دیر، بیراق اولرگه قرار آلیش‌لر و رهبرلیک‌که سهمیه بیریلمه‌یدی. شونینگ‌دیک، اولر اوزاق منطقه‌لرده عیال‌لردن حمایت قیلووچی ترماغ‌لر فعالیتی اوستی‌گه تاکیدله‌یدی.
اوتکن 14 ییل‌ده عیال‌لر ظرفیتی یوقاری کیتیشی خصوصیده، دنیا جماعه‌چیلیگی تامانیدن بیریلگن یاردم‌لر قنقه خرچ بولیشی هردایم تنقیدلر بیلن بیرگه بولیب کیلگن. تنقیدچیلرنینگ ایتیشیچه، بو پول‌لردن کوپینچه‌سی بی‌جا خرچ بولیب و عیال‌لر حیاتی اوستی‌گه تأثیر تشلمه‌گن.
