افغانستان ملی مدافعه وزیرلیگی نینگ بلند مرتبه‌لی رسمیلری یقین کونلرده مملکت بولیب 21 حربی تازه‌لش عملیات اوتکزیلیشی‌دن خبر بیرماقده‌لر.
ملی مدافعه وزیرلیگی نینگ معاونی دولت وزیری نینگ سلام وطندارگه بیلدیریشیچه، «فتح» ناملی اوشبو حربی عملیات هلمند، زابل، ارزگان و قندهار ولایت‌لری داخل خوف‌سیز منطقه‌لرده یول قوییله‌دی.
عین حالده، بهار فصلی باشله‌نیشی بیلن جنگری طالب‌لر گروهی «خیبر» ناملی عملیات یول‌گه قوییش بیلن دولت کوچ‌لریگه قرشی اوروش‌نی باشله‌گن لیک‌لری ایتیله دی. شونینگ‌دیک بوندن نیچه وقت آلدین هلمند ولایتیده اوتکزیلگن حربی عملیات موفقیت‌لی یکونلنگن لیگینی بیلدیرگن جناب وزیری، ملی اردو کوچلری هلمندنینگ تورلی منطقه‌لریده اونلب طالب‌نی نابود قیلگن‌لر دیگن.
میوند 215- قول اردو قوماندان‌لیگی نینگ باشلیغی دادن لونگ، ذوالفقار ناملی حربی عملیات‌ده 3500 حربی قتنشگن لیک‌لرینی معلوم قیلگن. اونینگ ایتیشیچه، عملیات‌ده پولیس و اردونینگ 93 حربی عسکری شامل جنگری طالب‌لرنینگ 400 نفری هلاک ایتگن.
عین حالده، هلمند ولایتی‌گه سفر قیلگن ایچکی ایشلر وزیری نورالحق علومی بو ولایت‌ده اوتکزیلگن حربی عملیات موفقیت‌لی بولگن لیگینی ایتیب، افغان ملی کوچلری زمانوی قورال ییراق‌لر بیلن جهازله‌نیش لری توغریسی‌ده تاکیدله‌گن.
دولت وزیری، افغانستان بویلب خوف‌سیزلیک میزانی کوزگه کورینرلی درجه‌ده آشیب باره یاتگن بیر پیت‌ده 21 حربی عملیات اوتکزیلیشی‌نی تیل‌گه آلگن. سونگی کونلرده قوراللی طالب‌لرنینگ هجومی سانی آشگن؛ یالغوز اوتگن هفته جریانی‌ده مملکت‌نینگ تورلی ولایت‌لریده قطار هجوم‌لر صادر ایتیلدی.
پنج شبنه 19- حمل، بلخ ولایتی‌نینگ باش قاره‌لاووچی‌لیک اداره‌سی تورت هجومچی تامانی‌دن حمله آستیگه آلیندی. مذکور حمله‌ده 18 انسان هلاک ایتیلیب، کمیده 66 کیشی آغیر و یینگیل یره‌لندی.
اوشبو هجومنی تصدیقله گن ذمه سیگه آلگن قوراللی طالب‌لر، بلخ ولایتی‌نینگ باش قاره‌لاووچی‌لیک اداره‌سیگه قیلینگن هجوم خیبر ناملی عملیات نینگ بیر قسمی بولگن لیگینی ایتگن.
عین حالده، جنگری طالب‌لر تامانی‌دن فاریاب ولایتی قیصار ولسوال‌لیگی‌ده اوچ پوسته قوشیمچه ایکّی قیشلاق تصروف ایتیلگن.
پروان ولایتیده یوز بیرگن پارتش ده اون بیر کیشی یره لندی
بوگون ایرتلب ساعت 9 ده پروان ولایتی نینگ سیاه گرد ولسوال‌لیگی نینگ بازاریده روی بیرگن پارتلش‌ده اوچ پولیس قوشیمچه سکیزنفر تینچ اهالی یره‌لندی. سلام وطندار بیلن تیلفونی علاقه‌ده بولگن سیاه گرد ولسوالی محمدسعید صدیقی، پارتلش بیر شفاخانه یقینی‌ده روی بیرگن لیگینی ایتگن.
جناب سعیدی گه کوره، حادثه‌ده قولی بارلیککه گمان سیره‌لیب هنوزگچه هیچ کیم اوشلنمه‌گن؛ اما بو حقده تیرگاوو باشلنگن. سیاه گرد پروان ولایتی نینگ نا‌برقرار ولسوال‌لیک‌لریدن سنه‌له‌دی.
بو ولایت‌ده ملی کوچ‌لر انده – سنده هجومآاستیگه آلینه‌دی.
طالب لر ولسوال‌لیک‌لرنی تصروف قیلیش‌ده
افغانستان‌ده امریکه حربی کوچلری نینگ اورین باسری جنرال مایک موری نینگ آرمی تایمز کونده لیگی‌گه ایتیشیچه، افغانستان‌ده اوروش‌نینگ ینگی فصلی باشلنگن. جناب موری، عصیانچی طالب‌لرنینگ فعالیتی آشگن لیگینی ایتگن.
امریکه‌لیک مذکور جنرال گه کوره، جنگری طالب‌لر مذکور فصل‌ده چیت ایللیک کوچ‌لردن کوره افغان ملی کوچ‌لرینی کوپراق هجوم آستیگه آله‌دی. امریکه‌لیک مذکور یوقاری مرتبه‌لی رسمی، بو قبیل سوزلرنی اوتگن هفته نینگ اوزیده ایکّی مرته افغانستان‌ده خلق ارا کوچلری طالب‌لر آرقه‌لی هجوم آستیگه آلینگن بیر چاغ‌ده ایتماقده.
جنرال موری، طالب‌لر افغانستان‌نینگ بعضی بیر ولسوال‌لیک‌لری و منطقه‌لرینی تصروف قیلیش‌گه اولگورگن بولیش‌لری ممکن دیگن. اما، طالب‌لرنینگ بو تهدیدلر افغان ملی کوچلری روحی گه سلبی تاثیر قویمس لیگی باره‌سیده ایشانچ بیلدیرگن موری.
شفقت‌سیز زوروانلیک‌لر و قربانلیک‌لر دوامی
افغانستان‌ده بیرلشگن ملت‌لر تشکیلاتی‌نینگ مخصوص نماینده‌سی نیکولاس هیسم، مملکت‌ده‌گی جاری اوروش‌نی قاره‌له‌گن.
افغانستان‌ده بیرلشگن ملت‌لر تشکیلاتی نینگ نماینده لیگی یا (یونما) اداره‌سی بیر خبرنامه ترقه‌تیب، پنج شنبه و جمعه کون‌لری صارد ایتیلگن هجوم‌لر مملکت‌ده‌گی زوروانلیک‌لر ینه هم تینچ اهالی‌دن قربان آلدی دییه بیلدیرگن.
اوتگن هفته پنج شنبه‌دن بویان مملکت بویلب صادر ایتیلگن هجوم، انتحار و یول چیتی‌گه اورنه‌تیلگن مایلرنی پارتلشی نتیجه‌سیده 31 انسان حیات‌دن کوز یومیب، کمیده 104 کیشی آغیر و یینگیل یره‌لنگنی ایتیله‌دی.
