افغانستان جمهورلیک سرایی، تینچلیک سوزلشوولری رسمی صورتده باشلهنیش مقصدیده افغانستاندن بیربلند مرتبهلی هیأت پاکستانگه سفر قیلگنیدن خبر بیرهدی.
جمهورلیک سرایی، مذکور هیأت سفری توغریسیده اونچهلیک معلومات بیرمهگن، بیراق پاکستانلیک «اکسپرس تریبون» کوندهلیگینینگ یازیشیچه، افغانستان تشقی ایشلر وزیرلیگی سیاسی اورین باسری حکمتخلیل کرزی طالبلر بیلن تینچلیک سوزلشوولرینی باشلهنیشی اوچون پاکستانگه سفر قیلگن.
بو کوندهلیک آتی فاش ایتیلیشینی ایستمهگن بیر رسمیدن نقلقیلیب یازیشیچه، ننگرهار ولایتی سابق والیسی افغانستان هیأتیگه شامل بولگن.
گزارشلرگه کوره، افغانستان حکومتینینگ نمایندهلیگیدن 9 رسمی بو هیأتگه شامل دییلهدی.
شونینگدیک طالبلر بو مطلبنی تائید قیلهدی. بیراق اوشبو گروهنینگ سوزلاوچیسی ذبیحالله مجاهد، اسلامآبادده افغانستان حکومتی و طالبلر اورتهسیده تینچلیک سوزلشوولری باشلنگنیدن خبرسیزلیک بیلدیرهدی.
پاکستاندهگی افغانستان ایلچی خانهسی رسمیلریدن بیرینینگ ایتیشیچه، حکومت و طالبلر اورتهسیده گی اولتیریش حکمتخلیل کرزی رهبرلیگیدهگی افغانستان هیأتینینگ ایکینچی کون سفریده و سونگی کونی طالبلرنینگ رهبرلیگیده اوتکزیلیشی ممکن.
بوندن آلدین اسلامآباددهگی رسمیلرنینگ ایتیشیچه، چیننینگ اورومچی شهریده جاری ییلده افغانستان و طالبلر هیأتینی کوتیب آلیشی ممکن.
شونینگدیک پاکستان باش وزیرینینگ ملی امنیت و تشقی ایشلر بوییچه ییریک مصلحتچیسی سرتاج عزیزنینگ پاکستان پارلمانیده ایتیشیچه، مذکور مملکت طالبلر و افغانستان حکومتی اورتهسیدهگی تینچلیک سوزلشوولرگه چیننینگ اورومچی شهریده زمینه یرهتهدی.
ایتیلیشیچه، بو سوزلشوولرده، طالبلرنینگ قطردهگی نمایندهلری قاری دین محمد و شیرمحمد عباس استانکزیلر حضور تاپیشی ممکن.
ملا جلیل، ملا حسن و عبدالرزاق طالبلرنینگ نمایندهلری صفتیده بیرینچی مرته چیننینگ اورومچی شهریده تینچلیک سوزلشوولریده اشتراک ایتکنلر.
نیچه آی آلدین پاکستان حربی کوچلرینینگ قومندانی راحیل شریف، افغانستان کیلگن چاغیده، سفریدن کیین تینچلیک سوزلشوولریگه زمینه یرهتیشینی ایتکن ایدی. بیراق نامعلوم دلیللر بیلن پاکستاننینگ عملی حضوری افغانستان تینچلیک سوزلشوولریده کیینگه قالدی.
