بیرلشگن ملتلر تشکیلاتینینگ افغانستاندهگی خاص نمایندهسی نیکولاس هیسمنینگ ایتیشیچه، افغانستان نیچه مملکت اوروشینی یالغیزلیکده اوز توپراغیده آلغه آلیب بارهدی.
جناب هیسم پنجشنبه کونی امنیت، اقتصاد و قیتهقوریش وضعیتینی تیکشیریش اوچون فاریاب ولایتیگه قیلگن سفری چاغیده ایتیشیچه، افغانستان یالغیزلیکده عدالت سیزلیک اوروشیده قرار تاپکن.
جناب هیسمنینگ فاریاب ولایت محلی رسمیلری بیلن اوچرهشگن چاغیده ایتیشیچه، افغانستان قوشنیلری بو مملکتده ناتینچلیک ریجهسینی آلغه آلیب بارهدی. جناب هیسم، بو اوروش یوکسلمسلیگی توغریسیده باشقه مملکتلرنی آگاهلنتیردی.
اونگه کوره، ایریم مملکتلر طالبلرگه یاردم بیرهدی. بیرلشگن ملتلر تشکیلات خاص نمایندهسی افغانستان اوروشی برابریده منطقهیی اویغونلیک همکارلیگینی سورهدی.
هیسمنینگ ایتیشیچه، افغانستان امنیتی وضعیت یخشیلنیشی اوستیگه ایشلهیدی و بونگه منطقه مملکتلری کیلیشووی لازم.
جناب هیسم، محلی رسمیلر بیلن نیچه ساعتلیک اوچره شوویدن کیین ایتیشیچه، امنیت، اقتصاد و قیته قوریش بولیملریدهگی قیینچیلیکلرنی روی خطگه آلگن و بولرنی بیرلشگن ملتلر تشکیلات مرکزی مسووللری بیلن شریک قیلهدی.
عین حالده، فاریاب ولایتی اورین باسری عبدالستار بارزنینگ ایتیشیچه، مذکور ولایت محلی ادارهسی بیرلشگن ملتلر تشکیلات مخصوص نمایندهسیگه ایریم تکلیفلر قیلگن و جناب هیسم، اولرنی عملگه آشیریشیدن سوزبیرگن.
باشقه تاماندن، بو اولتیریشده پارلمان نمایندهسی نقیبالله فایقنینگ ایتیشیچه، قشاقلیک، حکومت و بیرلشگن ملتلر تشکیلات دقت سیزلیگی باعث فاریاب ولایتیده ناتینچلیکلر کوپیگن.
اونگه کوره، فاریابده قشاقلیک اوز اوجیگه ییتیشگن و بو ولایتدهگی سونگی توقنه شوولرگه مینگ لرچه عایله بدرغه بولگن. جناب فایقنینگ ایتیشیچه، یاردم بیرووچی ملی و خلق ارا ادارهلری بو ولایت بدرغهلریگه یاردم بیرمهگن.
فاریاب ولایتیدهگی ناتینچلیکلر سونگی ایکی هفته جریانیده حکومت حربی ییریک رسمیلرینینگ ایاغینی بو ولایتگه تارتدی.
ایتیلیشیچه تیزلیکده جنرال عبدالرشید دوستم رهبرلیگیده مملکت شمالی اینیقسه فاریاب ولایتیده طالبانگه قرشی ییریک حربی عملیات اوتکزیلهدی.
