افغانستان شمال شرقیده جایلشگن تخار ولایتینینگ پولیس قوماندانلیگی جندالله گروهی ولایتنینگ اشکمش ولسواللیگیده حربی مرکز تاسیس قیلیشی بارهسیده قرار آلگنلیگی حقیده خبر بیرگن. تخار پولیس قوماندانی نور محمد حکیمینینگ سلاموطندارگه معلوم قیلیشیچه، جندالله گروهینینگ مرکزی قندوز ولایتیده افغان ملی کوچلری تامانیدن هجوم آستیگه آلینگندن کیین، مذکور گروه اعضالری اوز فعالیتلریگه دوام بیریش اوچون تخار ولایتینینگ اشکمش ولسواللیگیگه کیلیب حربی مرکز تاسیس قیلیشگه سعی وحرکت قیلگنلر.
جناب حکیمی، سابق قندوز ولایتینینگ چهاردره، امام صاحب و دشتارچی ولسواللیکلریده ترورچیلیک فعالیتلری بولگن جندالله حرکتی مملکت هوا ملی کوچلری آرقهلی هجوم آستیگه آلینگندن سونگ مذکور گروهنینگ اعضالری بغلان ولایتینینگ بورکه ولسواللیگی یولی بیلن اشکمش ولسواللیگیگه قاچیب اوتگنلیکلرینی اظهار قیلگن.
تخار امنیه قوماندانی، جندالله حرکتی تبلیغی گروهینی ولایت اهالیسی ایچیگه یوبارگنلیگی توغریسیده استخباراتی معلوماتلر قولگه کیریتیلگنلیگینی ایتگن. اَخیرگی وقتلرده جندالله حرکتیگه قوشیلگن ملاخداینظر ملی خوفسیزلیک ادارهسی نینگ ملازملری تامانیدن حبسگه آلینگنی ایتیلهدی. او، ملی امنیت آرقهلی اوتکزیلگن تیکشیرووده ولایتنینگ ایریم قیشلاقلریگه باریب خلق نی جندالله گروهیگه قوشیلیشگه ترغیب قیلگنلیگینی اعتراف ایتگن. قندوز ولایتی قلعه زال ولسواللیگینینگ یشاووچیسی بولگن ملاخداینظر اشکمش ولسواللیگیگه ییتیب کیلسمدن آلدین بیش یولدایشی بیلن ملی امنیت ادارهسی خادملری طرفیدن قولگه آلینگن.
اوزبیکستانلیک اشدی جندالله گروهی شمسی سکسنینچی ییللرده افغانستانده اوز ترورچیلیک فعالیتلریگه باشلهگن. مذکور گروهگه القاعده ترور ترماغی همده طالبان حرکتی بیلن یقین علاقهده بولگن «طاهر یولداش» ییتکچیلیک قیلگن. میلادی 2009- ییلده پاکستان دولتی طاهر یولداش امریکهنینگ اوچوچیسیز باشقریله دیگن حربی طیارهلرنینگ قیلگن هجومی نتیجهسیده پاکستان شمال غربیده اولدیریلگنلیگینی اینگن ایدی؛ اما 2010- ییلده طاهر یولداش بیر ویدیولولحه ترقهتیب مذکور خبرنی قارهلهگن ایدی.
جندالله گروهی یول چیکّهسیگه اورنهتیله دیگن ماین ایشلیب چیقاریش همده جهاد رهبرلرینی اولدیریش بیلن ترورچیلیک گروهلر ایچیده شهرت قازانگن حرکتلردن. افغانستان امنیتی مسؤوللریگه کوره، مذکور گروه سابق پامیر303 قوماندانی جنرال داوود داوود ینه قندوز ولایتینینگ سابق امنیه قوماندانی عبدالرحمن سیدخیلینی اولدیرگنلیکده قولی بولگن.
جندالله گروهینینگ افغانستان بولیمی رهبری «ابوحُذیفه» ناملی بیلن تانیلگن قاری غلام حضرت بوندن اوچ هفته آلدین اورین باسری «عمار» و بو حرکتنینگ اوچ نفر کلیدی اعضاسی بیلن ملی امنیت ادارهسی نینگ هوا هجومی نتیجهسیده قندوز ولایتیده هلاک ایتیلدی.
