.jpg)
قندوز ایکینچی مرته یعنی اوتگن ییل 5- میزانده قوراللی طالبلر اشغالیگه اوتگن بولسه- بو بار بیش کون کیچیکیب 11- میزانده دولت قوراللی مخالفلری تصروفیگه اوتدی. لیکن، اساسی دلیل بوندهکه قوراللی طالبلر اوتگن ییل فقط اوچ کون شهر مرکزینی سقلب تورگن ایدی؛ بیراق، بو گَل حادثه باشقهچه. طالبلر بو سَپر شهرنی بیر آز کیچیکیب اوز اشغالیگه آلیشگه موفق بولدی.
قندوز اوتگن ییل عین آیده جنگری طالبلر قولیگه توشگن ایدی، طالبلر بو ولایتگه ینه هجوم قیلیب حرکت نینگ کوچینی کوز – کوز قیلیشهیپتی. قندوزلیکلر روپه ره بولیب تورگن اونلب قیین چیلیک یانیده شهر اهالیسی اوی جایلرینی تَرک قیلیب آواره بولگن. بو مساله فقط قندوزلیکلرگه چیکلهنیب قالمی، بلکه تخار و بغلانلیکلرنی هم ییش اویلرینی تَرک قیلش مجبور ایتگن.
قندوز خلقینینگ اونلب اهالیسی، مدنی فعاللری و ولایتنینگ ملی کینگشدهگی اعضالری بوگون (پنجشنبه) اعتراضلی نمایش اوتکزیب، قندوزلیکلر شهرده قمهلیب قالگن، کیریشده هم چیقیشده هم یولی بولمهگن دیگنلر.
اعتراضچیلر، ملی کوچلر اورتهسیده هماهنگلیک یوق لیگی و مدیریت کوچ سیزلیگی قندوز جنگریلرنینگ اشغالیگه اوتیشی اوچون بیرینچی عامل حسابلنهدی دیگنلر. بو مساله حل ایتیلیشی اوچون موضوع نیچه بار مسووللر بیلن اورته گه قوییلگن، لیکن ایشیته دیگن قولاق نینگ اوزی تاپیلمهگن لیگی اعتراضچیلر تیلیدن بیان بولگن.
سنا مجلسیدهگی قندوز خلقی نینگ نمایندهسی عبدالله قرلق، قندوز ولایتیده ملی کوچلرنینگ 12 مینگ حربیسی موجودلیگیگه قرهمی، هنوز هم شهرده آغیر اوروش جریانی بار دیگن. قندوزلیک بو سناتور، خواجهمشهد، آزادیلیک چهار راههسی، امام صاحب بندری و نو آباد هلی هم دولت قوراللی مخالفلری قولیده ایکن لیگینی بیلدیرگن.
.jpg)
نمایشده اعتراضچیلر: «قندوزلیکلر حاضرهم قملده قالماقده، اولرنی چیقیش و کیریش یولی توسیب قوییلگن!» دیدیلر. اولر، یوللرنی یاپیب قوییلگن لیگی همده آغیر اوروش جریانی بارلیگی اهالیگه کته زیان ییتکزگن لیگینی تصدیقله گنلر.
شهردهگی موجود نابرقرارلیک بیر کیلو نفت 100 افغانی، بیر کیلو گاز 120 افغانی و بیرته نان ایسه 50 افغانیگه کوتاریلگن لیگی تاکیدلنهدی.
قندوز ولایتی ایکینچی مرته عصیانچی طالبلر نظارتیگه اوتیشی بغلان نینگ ایریم بولیملری بو حرکت تامانیدن نیچه بار هجوم آستیگه آلینشی ولایتدهگی بیر قنچه خصوصی و خلق ارا تشکیلات ملازملری ولایتنی تَرک ایتیشگه مجبور قیلگن.
پلخمری شهری نینگ یشاووچیلری، بغلان بیلن قندوز اورتهسیده اونچهلیک فرق یوق لیگینی بیلدیرگنلر. اولر « بغلان هم قندوز تقدیریگه دوچار بولیشی امکان» دن اوزاق ایمس دیگنلر.
بغلان نینگ قطار تومن و منطقهلریده نابرقرارلیکلر میزانی آشگنلیگینی تصدیقلهگن ولایت والیسی عبدالستار بارز، بغلان اوچون هیچ قندهی خطر موجود ایمس دیگن. ولایتدهگی ملی کوچلر جنگریلرنینگ دندغوری همده بغلان – قندوز و بغلان – مزار شریف یوللریدهگی هجومینی آرتگه اورگنلر دیدی ولایت حاکمی جناب بارز.
بغلان محلی مسووللری، اوتگن 24 ساعت آقیمیده پلخمری شهری نینگ قرغانتپه و دند غوری نینگ نیازالله منطقهسیده جنگری طالبلرنینگ 10 نفری اولدیریلگن و 11 تهسی یره لنتیریلگن دیگنلر. لیکن، ییتکرمه (رسانه)لرگه پیام یوللگن قوراللی طالبلر چهارشنبهدن پنجشنبهگه اوتر کیچهسی پلخمری شهری نینگ قرغانتپه منطقهسینی تصروف قیلیب، افغان حربیلردن 13 عسکرنی نابود قیلگن لیکلرینی ادعا ایتگنلر.
.jpg)
ایتیلیچه، قندوزده کیچه یاتگن آغیر اوروش تولقینلری نتیجهسیده اونلب خانهدان تالقانده پاش پنه ایزلهگن. تخار محلی بلند مرتبهلی رسمیلری، هنوزگچه قندوزلیک مینگلب آواره تالقان شهریگه کیلگن لیگینی اعتراف ایتگنلر.
سلاموطندار ترماغیگه صحبت بیرگن تخار ولایتی نینگ والیسی دکتر یاسین ضیا، اوروشده آواره بولگنلرگه همکارلیک قیلیش اوچون ولایت دییرلی امکانیتگه ایگه ایمس دیگن. تالقاندهگی آواره لر اوچون هلیگچه هیچ بیر نا دولت تشکیلات انسان پرورلیک یاردم ییتکزیب بیرمهگن لیگی تیلگه آلینهدی.
باشقه تاماندن تخار ولایتی نینگ محلی رسمیلری، ایریم یوقمه کسللیکلردن خواطر بیلدیرگنلر. اولرنینگ سوزلریگه کوره، آواره بولگنلر آچیق هوا همده یامان وضعیتده حیات کیچیره دیلر.
ایریم منبعلر، افغانستان شمال شرقیده جایلشگن قندوز شهری نینگ تورلی منطقهلریده جنگری طالبلر بیلن افغان ملی کوچلری اورتهسیده تورت کوندن بیری آتیشمه جریانی بارلیگینی معلوم قیلگنلر.
افغانستان ایچکی ایشلر وزیرلیگی نینگ خبرنامهسیده ایچکی ایشلر وزیری تاج محمد جاهد، بوگون قندوز بارگنی بیلدیریلگن. خبرنامهده، آتیشمه شهرنینگ ایریم منطقهلریده دوامی بارلیگی یازیلگن. وزیرلیک، قندوزگه ینگی حربیلر سَفر بَر ایتیلگن لیگی حقیده معلومات بیرگن.
