بغلان ولایت کینگشی، مرکزی بغلان تومنینینگ منگلهای منطقهسیده ملی پولیس کوچلری 120تهسی قورشاوگه آلینگن لیگی بارهسیده خبر بیرگنلر. اما، موضوع اونچهلیک جدی ایمسلیگینی بیلدیرگن محلی رسمیلری، بو کوچلرنی حربی قورال اسلحه بیلن جهازله نیشده سعی و حرکتی بارگن دیگنلر.
ولایت کینگشینینگ اورین باسری محبوبالله غفاری، یانلمه پولیس حربیلریدن عبارت اوشبو کوچلر اون کوندن بیری جنگری طالبلر قورشاویده ایکن لیگینی تیلگه آلگن.
جناب غفاری، محلی پولیسنینگ بو حربیلری جنگریلر قورشاویدن چیقاریلیشی اوچون حکومت جدی سعی و حرکت قیلمهگن حالده، قوراللی طالبلر اولرنی حبسگه آلیشی ممکن دیگن. او، هنوزگچه هم بو حربیلر قوتقاریلیشی اوچون عملیات اوتکزیلمهگن لیگینی بیلدیرگن.
ولایت کینگشینینگ اعضالریدن بیری ظریف ظریف، یانلمه پولیس کوچلری 14 کوندن بیری جنگری طالبلر قورشاویده قالگن دیگن. جناب ظریف ظریف گه کوره، قملده قالگن ملی کوچلرنی قوتقیزیش اوچون کیچه اوتکزیلگن عملیاتده منطقهگه یینگیدن کیلگن کوچلرنینگ 4 تهسی هلاک ایتیلگنلر. لیکن، جنگری طالبلر تلفاتی حقیده بیرار نرسه دیمهگن.
بوندن اوچ کون آلدین هم 9 کون قوراللی طالبلر قملیده بولگن ملی کوچلرنینگ 78 حربیسی، کماندو حربیلرنینگ مخصوص عملیاتدن سونگ قوتقریلگن ایدی.
لیکن، بغلان ولایت والیسینینگ سوزلاوچیسی محمود حقمل، « مساله اونچهلیک جدی ایمس" دیب، بو حربیلر هنوز هم ملی کوچلر بیلن اوروشده بولگنلیک لرینی بیلدیرگن.
اخیرگی نیچه هفته جریانیده بغلانده قوراللی طالبلرنینگ هجومی آشگن. جنگری طالبلر ینگی ییل باشلهنیشی بیلن ملمکت بولیب عمری عملیات اوتکزیشلری توغریسیده آگاهلنترگن ایدی. بو بیلن بیرگه مملکت شمالیده جنگری طالبلرنینگ ملی کوچلر مقابلیده بولگن هجومی میزانی آشیریلگن.
