بوگون دوشنبه افغانستاننینگ ایریم ولایتلری جملهدن هرات، لوگر، قندهار وهلمندده «اولسین پاکستان، اولسین افغانستان دشمنلری» شعارینی تیلگه آلیش بیلن پاکستانگه قرشی یوریش قیلگنلر.
لوگر ولایتیده اعتراض بیلدیرگنلر پاکستاننی تینچلیک مذاکرهلر اوتکزیلیشی اوچون ییریک توسیق بولگن لیگینی ایتگنلر.
نمایشچیلر بیر قطعنامه صادر قیلیش بیلن پاکستان حکومتیدن افغانستان وطالبلر اورتهسیده اوتکزیلهدیگن تینچلیک مذاکرهلرگه ارهلشمسلیگینی سورهگنلر.
باشقه تاماندن لوگر ولایتیده اعتراضدن سونگ ولایت کینگش نمایندهلری، دین عالملری و تینچ لیک کینگشی نینگ قطار اعضالری بیر ییغین اوتکزیب طالبلر رهبری ملااختر محمد منصورنی تینچلیک همده افغانستان دشمنی بولگنلیگینی ایتگنلر.
ولایت کینگشنینگ باشلیغی حسیبالله ستانکزینینگ ایتیشیچه، طالبلرنینگ ینگی رهبری پاکستان بویروغی اساسیده تینچلیک مذاکرهلرنی قبول قیلمهگن. او، ملامنصور امنیت و افغانستان دشمنی بولگنلیگی بارهسیده تاکیدلهگن. شونینگدیک حسیبالله افغانستانلیک طالبلر اوروشدن قول کوتاریب تینچلیک لایحهسیگه قوشیلیشیلرینی سورهگن.
ولایتنینگ دین عالملر همده تینچلیک کینگشینینگ رییسی اسدالله حنیف، افغانستان و طالبلر ارا آتیش کیسین اعلان ایتیلمهگن حالده، تنیچلیکنی تامینلش ممکن ایمس. او، افغانستانلیک طالبلر اوز قوللری بیلن اوز مملکتلرینی ویران قیلهدیلر دیگن.
عینحالده، اوز نامی فاش ایتیلیشینی ایستهمهگن پاکستانلیک بیر رسمینینگ مدیاگه ایتیشیچه، پاکستان حکومتی طالبلرنینگ ینگی رهبرینی تینچلیک مذاکرهگه کوندیریش اوچون سعی وحرکت قیلهدی.
طالبلرنینگ ینگیدن تعین ایتیلگن رهبری بیرینچی بیانیهسیده تینچلیک مذاکرهگه حاضر بولمی، اوروشگه دوام بیریشی بارهسیده تاکیدلهگن ایدی.
ملامنصورنینگ سونگی سوزلری جدی عکس العمللرگه روپهره بولدی. شونینگدیگ بوگون قندهار ولایتیده ده دین عالملری، مدنی جامعهچیلیک فعاللری، ولایت کینگش اعضالری بیر ییغین اوتکزیب طالبلر ینگی رهبری سوزلرینی قارهلهگنلر.
اوشبو اعتراضلر اوتگن هفته جمعه کونی افغانستان هئیتی همده قوراللی طالبلر نمایندهلری اورتهسیده چین یا ده پاکستان ده تینچلیک مذاکرهلری نینگ ایکینچی دوری اوتکزیلیشی ریجه لنتیریلگن ایدی. اما، طالب سابق رهبری ملاعمرنی وفات ایتیلیشی اعلان قیلینیشی بیلن اوشبو جریان نا معلوم وقتگه قدر آرتده قالدی.
پاکستان آچیق شکلده تجاوز قیلهدی
مملکت غربیده جایلشگن هرات ولایتینینگ هم اونلب یشاووچیسی حکومت رهبرلرنی قارهلب، اخیرگی وقتلرده پاکستان کنر و پکیتا ولایتلریده 25 کیلو متر افغانستان توپراغیگه ایلگری کیلگن لیگینی ایتگنلر.
مینگلب کیشیدن عبارت مذکور اعتراضچیلر ولایت بناسی قرشیسیده توپلهنیب نمایش اوتکزگنلر.
هرات ولایت کینگشینینگ نمایندهسی سمیه رامش حکومت رهبرلرینی اهالینی الدهش گه عیبلب، افغانستان حکومتی پاکستان نینگ آچیقلهین تجاوزی همده انتحاری هجوملری مقابلیده جیم تورگنلیکده عیب لهگن.
هلمندهم بوگون اعتراض لر گواهی ایدی. ولایتنینگ مدنی جماعهچیلک اعضالری حکومتدن پاکستان راکته هجوملری آلدی آلینیشی اوچون لازم سعی و حرکتلر قیلیشینی سورهگنلر. بو بیرینچی مرته ایمس افغانستان نینگ چیگره حدودلری پاکستان آرقهلی راکته هجوم آستیگه آلینسه. بوندن آلدین سابق جمهور رییس حامد کرزی زمانیده هم افغانستان نینگ چیگره حدودلری هر دایم پاکستان حربیلری تامانیدن هجوم آستیگه آلینیب کیلگن.
عین حالده، افغانستان تشقی ایشلر وزیرلیگینینگ سیاسی معاونی مساله اوچون اعتراض بیلدیریب، اوتگن آی پاکستان نینگ افغانستاندهگی ایلچیسینی موضوع بارهسیده جواب بیریش اوچون چقیرگن ایدی.
