افغان معلولیت لرونکي کرکټ لوبډلې د پاکستان په سفر کې کوربه کرکټ لوبډلې سره ۵ نړېوالې ۲۰ اوریزې یو ورځنۍ لوبې ترسره کړې.
د ورکړل شویو معلوماتو له مخې افغان معلولیت لرونکي کرکټ لوبغاړي د پاکستان په دې سفر کې ټولو ترسره شویو سیالیو کې پاکستانۍ لوبډلې څخه ماتې وخوړې او تش لاس د پیښور له لارې هېواد ته راستنه شول.
د پاکستان د معلولیت لرونکو کرکټ ویبپاڼې د معلوماتو له مخې افغانستان او پاکستان په دې سفر کې درې ۲۰ اوریزې نړیوالې لوبې ترسره کړې او په پایله کې درې واړه لوبې د پاکستان په ګټه تمامې شوې.
دغه راز د سیالیو په ترڅ کې دوې نړېوالې یو ورځنۍ کرکټ لوبې هم ترسره شوې، چې پکې پاکستانۍ لوبډلې بریاوې خپلی کړې.
د سیالیو په پای کې د افغانستان کرکټ معلولیت لرونکي کرکټ ملي لوبډلې مسول او روزونکي عبدالمنان مسعود پاکستاني رسنیو ته په خبرو کې د دغه کرکټ بورډ د میلمستیا او بلنې مننه وکړه.
افغانستان ته راستنیدو پر مهال مسعود له پاکستاني سپورټي مسولانو وغوښتل، چې په ځوابي سفر خپله پاکستانۍ معلولیت لرونکي لوبډله د سیالیو لپاره افغانستان ته راولیږي.
دا لومړی ځل و، چې افغانستان په یوه دوه اړخیزه نړېوال کرکټ سیالیو کې له پاکستانۍ معلولیت لرونکي کرکټ ملي لوبډلې سره ۵ نړیوالې سیالۍ ترسره کوي.
افغانستان او پاکستان معلولیت لرونکو کرکټ ملي لوبډلو ترمنځ ټولې سیالۍ د پاکستان په تر ټولو ناامنه کراچۍ ښار کې وشوې.
