د فوټبال اسیایي شورا له خوا د غوره فدراسیونونو د درجه بندۍ له مخې افغانستان خپل د تيرکال مقام له لاسه ورکړی دی.
د فوټبال فدراسیون له خوا خپره شوې خبرپاڼه لیکي، چې افغانستان تېرکال د اسیا په کچه ۲۹ م غوره فوټبال فدراسیون وو، خو سږ کال له یوه هیواد وروسته شوې او ۳۰ م مقام کې راغلی دی.
د یادونې وړ ده، چې د فوټبال اسیایي شورا له خوا د هیوادونو د فدراسیونونو مخکې او شاته تګ د هغه هیواد د فوټبال ملي لوبډلې کارکردګۍ او په کورنۍ کچه د فوټبال کلپونو کارکردګۍ پورې نیغ په نیغه تړلي وي.
د فوټبال اسیایي شورا د یوه هیواد فدراسیون درجه بندۍ له پاره ۷۰ سلنه د کورنیو فوټبال کلپونو وده او دغه راز ۳۰ سلنه په نړېواله کچه د فوټبال ملي لوبډلې کارګردګي په نظرکی نیول کیږي.
یاده دې وي، چې اوسمهال د افغانستان هیڅ کوم کورنی فوټبال کلب په اسیایي سیالیوکې نه دی لوبیدلی او ترلاسه شوې دیرشم مقام د افغانستان فوټبال ملي لوبډلې په کارکردګۍ افغان فوټبال فدراسیون ته ورکړل شوی دی.
د فوټبال اسیایي شورا له خوا د غوره فدراسیونو په درجه بندۍ کې د سویلي کوریا فدراسیون لومړی مقام خپل کړی دی.
د درجه بندۍ له مخې سعودي عربستان دویم، ایران درېیم، جاپان څلورم او د عربي اماراتو فوټبال فدراسیون بیا پنځم غوره اسیایي فدراسیون اعلان شوي دي.
پټه دې پاتې نه وي، چې تېرکال د افغانستان ۲ فوټبال کلپونو ته په اسیایي فوټبال کلپونو سیالیو کې د لوبیدو چانس ورکړل شوې وو، خو افغان فوټبال فدراسیون د نامعلومه دلایلو له کبله دغو سیالیو ته خپل فوټبال کلپونه ونشو لیږلې.
د دې ویره هم شته که افغانستان په دوامداره توګه په اسیایي فوټبال کلپونو سیالیو کی خپل فوټبال کلپونه ونه لوبوي، نو امکان شته چې د افغانستان فوټبال فدراسیون په اسیايې کچه نور هم شاته لاړ شي.
