افغانستان ته د کرکټ نړېوالې شورا له خوا د دغه شورا بشپړ غړیتوب ورکړل شو، چې په دې سره په ټسټ لوبو کې د افغان کرکټ لوبغاړو د لوبېدو خوب هم ريښتیا شو.
له دې وروسته به افغانستان کرکټ بورډ ته د کال شاوخوا ۵ میلیونه ډالره ورکول کيږي او د پخوا په پرتله به يې د نړۍ له نورو ټیمونو سره د لوبو کولو چانس هم زیات شي.
د راپورونو لهمخې په دې سره به د افغانستان کرکټ بورډ د پخوا په پرتله خورا غښتلی شي او د لوبغاړو د ظرفیت لوړولو په برخه کې به موثر ګامونه واخلي.
د کرکټ د پرمختګ لهپاره د هېواد په بېلابېلو برخو کې د نویو لوبغالو جوړول، د ملي لوبغاړو د پياوړي کولو لهپاره په بېلابېلو برخو کې د روزنکو ګومارل او نور شامل وي.
که څه هم د کرکټ نړېوالې شورا پخوا پر افغانستان دا شرط ايښی و، چې باید ښځينه کرکټ ټيم رامنځ ته کړي او بیا به بشپړ غړیتوب ورکړي، خو د راپورونو پر بنسټ، د افغانستان کرکټ بورډ دوی ته قناعت ورکړی، چې د افغانستان په شان په یو اسلامي او سنتي هېواد کې اوسمهال د ښځينهو کرکټ ټيم جوړول له امکانه لرې خبره ده.
د دفاع پرمهال د افغانستان کرکټ بورډ څخه د هندوستان او انګلستان هېوادونو د کرکټ بورډ مسوولینو لهخوا ځينې سوالونه هم شوي دي.
همدارنګه د افغانستان سره ایرلنډ هېواد هم بشپړغړیتوب ترلاسه کړی دی.
له دې سره د کرکټ په نړېواله شورا کې د بشپړ غړیتوب لرونکو هېواد شمېر ۱۲ ته ورسيد، چې افغانستان او ایرلنډ پکې وروسته له ۲۹ کلونو ور زیات شوی دی.
