یو شمېر معترض نوماندان د کابل ولایت د ټاکنو لومړنیو پایلو تر اعلان څو ساعته وروسته یادې پایلې رڼې نه بولي او د کابل ټاکنیزې حوزې د رایو باطلول غواړي.
د کابل یو معترض نوماند هارون معترف سلاموطندار ته ویلي چې د دغه ولایت د پارلماني ټاکنو پایلې د پیسو په بدل کې اعلان شوې دي.
د نوموړي په وینا، معترضو نوماندانو ته د ټاکنیزو شکایتونو کمېسیون مخکینۍ پرېکړه د منلو ده او دوی هم غواړي چې د کابل ولایت ټولې رایې باطلې اعلان شي.
یو بل معترض نوماند دینمحمد دروېشي وايي، د کابل ولایت ټاکنې له درغلیو ډکې وې، هغه کمېشنران او نوماندان چې درغلي یې کړې باید عدلي او قضايي ارګانونو ته ور وپېژندل شي.
پر ټاکنو د څار بنسټونه بیا د کابل ولایت د ټاکنو په اړه وېشلي نظرونه لري.
د افغانستان د ازادو او عادلانه ټاکنو یا فیفا بنسټ اجرایوي رییس یوسف رشید وايي، د ټاکنو لومړنۍ پایلې وروستۍ نهدي او ښايي په وروستیو پایلو کې یې د پام وړ بدلونونه راشي.
خو د افغانستان د رڼو ټاکنو یا ټیفا بنسټ رییس نعیم ایوبزاده بیا په درې میاشتو کې د کابل د لومړنیو پایلو اعلان د ټاکنو کمېسیون لپاره یوه بریا یادوي.
د نوموړي په وینا، د دوی د موندنو له مخې د کابل په ګډون، د ۳۳ ولایتونو په ټاکنو کې ستونزې شته، خو دوی به یې په اړه اسناد او شواهد د ټاکنیزو شکایتونو کمېسیون ته وسپاري او یاد کمېسیون هم مسوولیت لري چې عدالت تامین کړي.
خو د ټاکنو خپلواک کمېسیون ویاند ذبېحالله سادات له معترضو نوماندانو غواړي چې په ۴۸ ساعتونو کې خپل شکایتونه په ټاکنیزو شکایتونو کمېسیون کې ثبت کړي.
د ټاکنو خپلواک کمېسیون له درې میاشتو ځنډو وروسته تېر پرون ماښام د کابل د ولسي جرګې د ټاکنو لومړنۍ پایلې اعلان کړې چې له مخې یې ۳۳ کسان چې ۲۴ یې نارینه او ۹ ښځینه دي، د نورو په پرتله ډېرې رایې وړې وې او په لومړنیو پایلو کې بریالي اعلان شول.
