فاریاب کې د ټاکنو خپلواک کمېسیون ولایتي دفتر عمومي مدیر شکر محمد وايي، د امنیتي ګواښونو له امله د دغه ولایت غورماچ، کوهستان او بلچراغ ولسوالیو کې د ولسي جرګې ټاکنې نه کېږي.
نوموړی همدارنګه وايي، دولتاباد، شېرینتګاب، خواجهسبزپوش، المار، او ګرزیوان ولسوالۍ هم تر لوړ امنیتي ګواښ لاندې دي.
د هغه په وینا، یوازې د دغو ولسوالیو په مرکزونو کې د رایو ورکولو مرکزونه فعال دي او بس.
د غورماچ ولسوال میرویس داودزی سلاموطندار ته وايي، دغه ولسوالۍ په بشپړه توګه د طالبانو تر کنټرول لاندې ده او د رایو ورکولو هېڅ کوم مرکز په کې فعال نهدی.
ښاغلی داودزی زیاتوي، دې ولسوالۍ کې شاوخوا ۱۴ زره کسانو د ولسي جرګې ټاکنو کې د ګډون لهپاره نوملیکنه کړې وه؛ خو اوس د ناامنیو له امله خپله رایه نهشي کارولی.
د فاریاب والي ویاند جاوید بیدار وايي، بلچراغ او غورماچ ولسوالۍ د طالبانو په کنټرول کې دي او کوهستان ولسوالۍ ته غځېدلې لاره کې هم د طالبانو حضور پراخ دی چې په همدې دلیل امنیتي ځواکونه هلته امنیت نهشي ټینګولی.
سره له دې چې د ولسي جرګې ټاکنو ترسره کولو ته یوازې دوې ورځې پاتې دي؛ خو د فاریاب په ولسوالیو کې د ورځې په تېرېدو سره امنیتي وضعیت ترینګلی کېږي او دغو ولسوالیو کې د رایو ورکولو مرکزونه یو په بل پسې د تړل کېدو په حالت کې دي.
