افغانستان د روسیي په کوربتوب ۲۰۱۸ کال فوټبال نړیوال جام سیالیو ته د لارموندنې په موخه لومړۍ تاریخي بریا ترلاسه کړه.
د افغانستان فوټبال فدراسیون وایي، چې ملي لوبډلې نن د یوې په زړه پورې لوبې وروسته د مصطفی ځاځي د ۸۵ مې دقیقې ګول په واسطه کوربه کمبودیايۍ لوبډلې ته ۱-۰ په مقابل کې ماتې ورکړه.
په دې بریا سره افغانستان په پنځم (ای) ګروپ کې لومړی او ټول ۳ امتیازه وګټل.
دغه لوبه د کمبودیا په پلازمېنه (پنوم پن) المپیک لوبغالي کې د زرګونو نندارچیانو په موجودیت کې وشوه.
دا لومړی ځل و، چې افغان فوټبال ملي لوبډله، د نړیوال جام سیالیو لپاره په ټاکنیز پړاو کې لوبه ګټي.
له دې وړاندې افغان لوبډلې لومړۍ لوبه په ایران کې ۰-۶ په مقابل کې سوریې نه ماتې خوړلې وه.
د فوټبال فدراسیون د چارواکو په وینا، چې افغان لوبډلې د کمبودیا د مینه والو له فشار سره – سره ښه لوبه وکړه، بال یې ډېر په ولکه کې و او د کمبودیا د لوبډلې د ګول دروازې پر لور یې پرلپسې بریدونه وکړل.
د کمبودیا خلاف سیالۍ کې عصمت شینواري د لوبې په دویمه نیمایي ۵۷ مه دقیقه کې زېړ کارت واخیست او بیا د روزونکي سلوان له خوا د لوبې په ۸۶ مه دقیقه کې د نورالله امیري لپاره له لوبې کینول شو.
د یادونې ده، چې عصمت شینواري تېره اونۍ په بنګله دېش کې د افغانستان لپاره د کوربه لوبډلې پر خلاف د برابرۍ ګول وهلی و.
ټاکل شوې ده، په روانو سیالیو کې به افغان لوبډله د سنبلې په ۱۷ مه نېټه له پیاوړې اسیایۍ لوبډلې جاپان سره د لوبې میدان ته راووځي.
