د افغانستان کرکټ ملي لوبډلې پخوانی کپتان او مشهور لوبغاړی محمد نبي عیسې خېل د بنګله دېش سوداګریزو شل اوریزه کرکټ سیالیو له پاره واخیستل شو.
د بنګله دیش کرکټ بورډ د رسمي ویبپانې د معلوماتو له مخې چې نوموړی نن د ۳ نورو افغان لوبغاړو سمیع الله شینواري او دولت ځدران په مینځ کې لیلامۍ ته وړاندې شو چې د (رانګپوررایډرز) لوبډلې لهېخوا جذب شو.
د یادونې وړ ده چې ټول افغان لوبغاړي په (ډي) کیټیګرۍ کې شامل وو، خو نبي عیسی خېل به اوس د نړۍ د مخکښه کرکټرانو په مینځ د لوبېدو ترڅنګ ۳۰ زره امریکایي ډالره هم ترلاسه کړي.
دا دویم ځل دی، چې محمد نبي عیسی خېل د بنګله دېش په غوره کرکټ لیګ سیالیو کې لوبېدو ته غوره کیږي، خو سمیع الله شینواری، دولت ځدران او ګلبدین نایب بیا تراوسه د کومې لوبډلې له خوا نه دي اخیستل شوي او ښایي د اړتیا په صورت کې د کومې لوبډلې له خوا جذب شي.
تېرځل شاپور ځدران او حمید حسن هم دغو سیالیو ته غوره شوي وو او ښه ځلیدلي هم وو، خو دا ځل دواړه لوبغاړي د نامعلومه دلایلو له کبله هیڅ په لومړني لیست کې هم نه وو اخیستل شوي.
نبي عیسی خېل تیرځل هم په دې سیالیو کې د سمیع الله شینواري، حمید حسن او شاپورځدران ترڅنګ برخه اخیستې وه او هغه مهال د (سیلهیټ) لوبډلې په ګټه لوبیدلې وو او ښه ځلیدلې هم وو.
د رانګپور رایډرز لوبډلې د رسمي پاڼې د معلوماتو له مخې، چې د افغان لوبغاړي محمد نبي عیسی خیل ترڅنګ د دوی له خوا د کورنیو لوبغاړو سومیا سرکار، میتیون علي، ثقلین ساجب، عرفات سني او شکیب الحسن ترڅنګ د ډیرن سمي، وهاب ریاض، سچیتراسنانایکي، تیسارا پریرا، لینډل سیمینزاو تلکرتني دیلشن په څیر تکړه او مشهوره کرکټ لوبغاړي خپلې لوبډلې ته جذب شوي دي.
د بنګله دېش درېیم پړاو سوداګریزې غوره کرکټ لیګ سیالۍ به د روان کال نومبر میاشتې په ۲۱ مه نیټه د بنګله دېش په بېلا بېلو ښارونو کې پېل شي.
دغه سیالۍ د ۲ کلونو له پاره د فساد تورونو له کبله ځنډیدلې وې، خو یوځل د ۶ لوبډلو ډهاکه ډینامیټس، باریسال بولز، سیلهیټ سوپرسټارز، رانګپور رایډرز، چټاګانګ ویکینګز او کومیلا ویکټورینز ترمینځ ترسره شي.
